Экс-дзяржсакратар ЗША Гілары Клінтан набрала галасы большасьці дэлегатаў зьезду Дэмакратычнай партыі і стала верагодным кандыдатам у прэзыдэнты ад дэмакратаў, паведамілі тэлекампанія NBC і Associated Press.
Клінтан, якая восем гадоў таму завяршыла першую спробу дамагчыся намінацыі, прызнаўшы сваю паразу на праймэрыз, сёньня становіцца першай жанчынай, якая забясьпечыла сваё вылучэньне ад буйной палітычнай партыі ў ЗША.
Паводле падлікаў NBC, Гілары Клінтан валодае галасамі 1812 дэлегатаў і 572 супэрдэлегатаў, у той час як у сэнатара ад Вэрманта Бэрні Сандэрса – 1520 дэлегатаў і 46 супэрдэлегатаў.
Клінтан атрымала большасьць у 2383 дэлегаты з улікам галасоў «супэрдэлегатаў». Апошнія зьвесткі ўключаюць больш за дзясятак новых супэрдэлегатаў, а таксама 36 дэлегатаў, якіх яна атрымала ў свой актыў па выніках нядзельных праймэрыз у Пуэрта-Рыка.
У сваёй заяве кіраўнік перадвыбарнага штабу Клінтан Робі Мук назваў гэта дасягненьне «важным», але быў стрыманым:
«Гэта важная вяха, але ёсьць яшчэ шэсьць штатаў, якія галасуюць у аўторак, дзе мільёны людзей накіруюцца на выбарчыя ўчасткі, і Гілары Клінтан працуе над тым, каб атрымаць кожны голас, – сказаў Мук. – Мы чакаем вечара аўторка, калі Гілары Клінтан атрымае ня толькі большасьць галасоў выбаршчыкаў, але і большасьць дэлегатаў, зьвязаных абавязацельствам галасаваць за яе».
Сама Клінтан, выступаючы ў горадзе Лонг-Біч, штат Каліфорнія, таксама адзначыла, што яе кампанія яшчэ не скончаная:
«У навінах кажуць, што мы на мяжы гістарычнага, беспрэцэдэнтнага моманту, але нам бо яшчэ трэба сёе-тое зрабіць, праўда? – Сказала яна. – У нас выбары ў шасьці штатах заўтра, і мы будзем змагацца з усіх сіл за кожны голас, асабліва тут, у Каліфорніі!»
Каб атрымаць намінацыю, кандыдат павінен набраць большасьць ад усіх дэлегатаў зьезду – 2383.
Але 15 адсоткаў ад усіх дэлегатаў складаюць «супэрдэлегаты» — былыя і цяперашнія дзеячы партыі, якія займаюць выбарныя пасады, а таксама партыйныя актывісты. Суперделегаты не абавязаныя галасаваць за кандыдата, падтрыманага выбаршчыкамі ў ходзе праймэрыз.
У штабе суперніка Клінтан Бэрні Сандэрса паабяцалі працягваць барацьбу, заявіўшы, што няправільна лічыць галасы супэрдэлегатаў да таго, як яны будуць сапраўды пададзеныя на зьезьдзе партыі ў ліпені.
