Лінкі ўнівэрсальнага доступу

У Гомелі зьявіліся вуліцы Ламаносава і Абеля, а ня Быкава і Караткевіча


Бюст Ламаносава ў Гомелі
Бюст Ламаносава ў Гомелі

Галоўны тэлеканал краіны «Беларусь-1» паведаміў 3 сьнежня, што ў Гомелі зьявіліся вуліцы імя Васіля Быкава і Ўладзімера Караткевіча. Навіну падхапіў шэраг рэгіянальных інфармацыйных рэсурсаў, у тым ліку і сайт абласной газэты «Гомельская праўда».

Паведамлялася, што ў былым рабочым пасёлку Касьцюкоўка, які сёлета афіцыйна стаў адным зь мікрараёнаў Гомелю, рашэньнем гарсавету дэпутатаў перайменавана каля двух дзясяткаў вуліц. Сярод іншых зьявіліся, маўляў, вуліцы імя Кірылы Тураўскага, Уладзімера Караткевіча, Васіля Быкава. Але ўжо 7 сьнежня навінавыя сайты сталі здымаць гэтую інфармацыю, бо яна не адпавядала рэчаіснасьці.

Будынак колішняга пасялковага савету ў Касьцкоўцы
Будынак колішняга пасялковага савету ў Касьцкоўцы

Дэпутат гарсавету па Касьцюкоўскай выбарчай акрузе № 9 Уладзімер Радчанка заяўляе, што ня памятае, каб вуліцам давалі імёны Быкава й Караткевіча. Вось што вуліцу Сьветлагорскую пераназвалі ў імя заснавальніка гуртка арыгінальнага жанру Валерыя Абеля, які стаў пасьля заслужаным аматарскім цыркавым калектывам, — гэта ёсьць. І вуліцу Гомельскую перайменавалі ў гонар Міхаіла Ламаносава, бо нібыта надта ж прасілі работнікі ААТ «Гомельшкло». Некалі сам шклозавод насіў яго імя, потым яно адпала як рудымэнт савецкай эпохі, а бюст Ламаносаву застаўся стаяць пры будынку дырэкцыі прадпрыемства.

«Хто і адкуль узяў інфармацыю пра вуліцы Быкава і Караткевіча, я ня ведаю, — тлумачыць галоўная спэцыялістка гарсавету Аксана Петрачэнка. — Рашэньне пра перайменаваньне вуліц у Касьцюкоўцы прыняла сэсія гарсавету 29 лістапада. Яно накіравана на рэгістрацыю ў Міністэрства юстыцыі і пасьля будзе апублікаванае. Пра наданьне вуліцам імёнаў Быкава, Караткевіча ці Кірылы Тураўскага ў рашэньні гарсавету нічога няма. Былі такія прапановы падчас грамадзкага абмеркаваньня, але канчатковы выбар рабілі жыхары Касцюкоўкі. Дэпутаты толькі ўзаконілі прапановы».

Касюцюкоўка
Касюцюкоўка

Кіраўнік абласнога аддзяленьня Саюзу беларускіх пісьменьнікаў Анатоль Бароўскі так пракамэнтаваў сытуацыю:

«Вельмі прыкра, што гарсавет не прыслухаўся да прапаноў даць вуліцам імёны Быкава й Караткевіча. Касьцюкоўка, можа, і не самае лепшае месца, дзе мусяць быць такія вуліцы, але ўжо калі пераймяноўваць, то пра беларускі складнік ніяк забываць нельга. Ну якое дачыненьне да Касьцюкоўкі мае расейскі псэўданавуковец Ламаносаў? Аніякага! Бяда ў тым, што ўладныя структуры ў краіне так і застаюцца „савецкімі“, а не беларускімі».

Не адважыліся дэпутаты надаць хоць якой вуліцы імя барона Нолькіна, якому пасёлак Касьцюкоўка абавязаны сваім існаваньнем.

Зрэшты, на адной з інтэрнэт-мапаў Касьцюкоўкі вуліцы перайменавалі яшчэ да рашэньня гарсавету.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG