Лінкі ўнівэрсальнага доступу

Караткевіч у Швэцыі: «Трэба, каб беларуская апазыцыя трапіла і ў мясцовыя саветы»


Адкрыцьцё сэмінару па Беларусі ў Швэдзкім парлямэнце. Сярод дакладчыкаў Тацяна Караткевіч (у сінім)

Адкрыцьцё сэмінару па Беларусі ў Швэдзкім парлямэнце. Сярод дакладчыкаў Тацяна Караткевіч (у сінім)

Лідэрка кампаніі «Гавары праўду» Тацяна Караткевіч 13 кастрычніка ўзяла ўдзел у канфэрэнцыі пра Беларусь у швэдзкім парлямэнце.

У канфэрэнцыі ўдзельнічае больш за 100 чалавек – гэта прадстаўнікі грамадзянскай супольнасьці, журналісты, палітыкі, амбасадары розных дзяржаў. Галоўнае пытаньне — вызначэньне стратэгіі разьвіцьця дачыненьняў зь Беларусьсю.

Як паведаміла прэсавая служба «Гавары праўду», Тацяна Караткевіч заявіла, што сёньня дэмакратычныя сілы павінны выкарыстоўваць трэнды, якія стварае ўлада, і напаўняць іх сваім зьместам, а таксама пашыраць прастору дыялёгу на ўсіх узроўнях краіны.

«Мы бачым невялікія якасныя зьмены, і вельмі важна зрабіць так, каб яны пашыраліся, залучаючы грамадзтва ў працэс прыняцьця рашэньняў. Мы вітаем зьяўленьне альтэрнатывы ў парлямэнце; важна працягваць, каб па выніках мясцовых выбараў альтэрнатыва зьявілася і на рэгіянальным узроўні».

Тацяна Караткевіч у Стакгольме таксама сустрэлася зь міністрам па справах ЭЗ і гандлю Ганнай Ліндэ, міністрам замежных справаў Маргат Вальстрэм, сьпікерам швэдзкага парлямэнту Урбанам Алінам.

Пасьля сустрэч палітык сказала, што Швэцыя зацікаўлена ў разьвіцьці стасункаў зь Беларусьсю і гатовая рэальна дапамагчы ў рэалізацыі цэлага шэрагу рэформаў.

«Для Беларусі скандынаўскі досьвед можа быць вельмі карысны. У той жа Швэцыі пасьпяховая рынкавая эканоміка выдатна спалучаецца з сыстэмай моцнай сацыяльнай абароны насельніцтва. Супрацоўніцтва паміж нашымі краінамі будзе значна больш плённым, калі ў Беларусі будзе не імітацыя пераўтварэньняў, а рэальныя перамены. Мяч сёньня на баку беларускай улады».

Са Стакгольму Тацяна Караткевіч вылецела ў Брусэль, дзе ўзяла ўдзел у пасяджэньні рабочай групы парлямэнцкай асамблеі Ўсходняга партнэрства «Эўранэст».

Паказаць камэнтары

XS
SM
MD
LG