Лінкі ўнівэрсальнага доступу

Каб адзецца і абуцца, гамельчукі едуць ва Ўкраіну


Чарнігаўскі чыгуначны вакзал
Чарнігаўскі чыгуначны вакзал

Жыхары памежных раёнаў Беларусі аднавілі масавыя паездкі ва Ўкраіну. Езьдзяць найперш адзецца і абуцца. Набываюць і прадукты харчаваньня, якія ў суседзяў таксама таньнейшыя.

Апошнім часам аўтаперавозчыкі нават у будзённыя дні вымушаны арганізоўваць дадатковыя аўтобусныя рэйсы ў бліжэйшы ад Гомеля ўкраінскі горад Чарнігаў.

Людзей так шмат, што плянавых рэйсаў не хапае. У гамельчукоў, выглядае, канчаткова разьвеяліся колішнія страхі, якія насаджаліся афіцыйнай расейскай прапагандай наконт сытуацыі ва Ўкраіне нават па-за зонай ваеннага канфлікту. Засталося хіба толькі адчуваньне, што самі ўкраінцы ня маюць ужо вялікага даверу да ўсходняга суседа. Яно заўважна нават у Гомелі на аўтавакзале. Білетныя кантралёры перад адпраўкай кожнага аўтобуса ва Ўкраіну пытаюцца, ці ёсьць пасажыры з расейскімі пашпартамі. Ім, каб ехаць ва Ўкраіну, патрэбны цяпер ня толькі адмысловыя пашпарты для замежных вандровак, але і запрашэньні ад украінскіх сваякоў ці знаёмых. Іначай на ўкраінскай мяжы іх проста завернуць назад.

А беларусам — дарога вольная. Зразумела, з пашпартным кантролем і мытным надглядам. Сто шаснаццаць кілямэтраў — і ўсе аптовыя склады, крамы, рынкі Чарнігава гасьцінна расчыненыя.

Гамяльчук Кірыл ня першы раз прыяжджае закупляцца на аптовыя склады, што на вуліцы Шчорса ў Чарнігаве:

«Тут ціхі і спакойны народ — ня першы раз сюды ежджу. Купляем тут курткі, таньнейшы абутак. Якасьць адпавядае кошту. Я, напрыклад, пастаянна купляю абутак і па кошце выйграю амаль у два разы. Тут ціха й спакойна, і ніякіх пытаньняў у мяне ніколі не ўзьнікала».

Бойкі гандаль у Чарнігаве пачынаецца за сто мэтраў ад вакзалу
Бойкі гандаль у Чарнігаве пачынаецца за сто мэтраў ад вакзалу

Спадарыня Алена, якая таксама прыехала з Гомеля адзяваць у Чарнігаве дачку, кажа, што яе не палохаюць нават дарожныя выдаткі — крыху больш як 150 тысяч беларускіх на чалавека ў абодва канцы з квітком на багаж. Гэта акупляецца, бо і абутак, і адзеньне ва Ўкраіне таньнейшыя. Нават згушчонка Рагачоўскага малочна-кансэрвавага камбінату, прывезеная зь Беларусі, тут каштуе ўсяго толькі 23 грыўні, што адпавядае 50 цэнтам. У Гомелі бляшанка той жа згушчонкі на чвэрць даражэйшая.

Рагачоўская згушчонка — 23 грыўні на бляшанку
Рагачоўская згушчонка — 23 грыўні на бляшанку

Яе, дарэчы, прапануюць гараджанам і прыежджым вулічныя гандляры непадалёк ад вакзалу.

Алена: «Тут, вядома, нашмат таньней. Усё».

Украінская прадавачка Натальля з Цэнтральнага рынку ў Чарнігаве ўсьцешаная, што беларусы сталі часьцей наведваць іхні горад:

«Дужа зьмянілася сытуацыя. Людзі вашы да нас едуць — з Гомеля, зь Беларусі наагул. Мы шчыра рады, што да нас прыяжджаюць. Бяруць усё — прадукты харчаваньня, адзеньне. Сытуацыя стала мяняцца ў лепшы бок месяца паўтара таму — да нас сталі езьдзіць беларусы. Да гэтага, асабліва мінулым летам, амаль ніхто ня езьдзіў».

Вулічныя гандляры
Вулічныя гандляры

Беларускія чыгуначнікі своеасаблівым чынам адрэагавалі на зьмяншэньне пасажырскага патоку. Яны сёлета скасавалі штодзённы дызель-цягнік па маршруце Гомель — Чарнігаў — Гомель, пакінуўшы толькі суботні рэйс. І людзі пераселі на прыватныя аўтамабілі. Увечары на ўкраінскім памежным пераходзе Новыя Ярылавічы зьбіраюцца дзясяткі легкавікоў з гомельскімі нумарамі — людзі вяртаюцца з закупаў ва Ўкраіне.

Вяртаньне дадаму. Украінскі памежны пераход
Вяртаньне дадаму. Украінскі памежны пераход

Украінскі крызіс, абумоўлены вайной на Данбасе, выклікаў і прапановы па пашырэньні міждзяржаўнага гандлю. Адзін красамоўны прыклад. Калі раней Украіна сама прадавала Беларусі электраэнэргію, то цяпер беларускае Міністэрства энэргетыкі падрыхтавалася, каб пастаўляць яе пры неабходнасьці сваім паўднёвым суседзям.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG