У прэсавай службе Міністэрства транспарту і камунікацыяў адмовіліся камэнтаваць Свабодзе словы Аляксандра Лукашэнкі пра «гатоўнасьць адправіць у адстаўку міністра Анатоля Сівака».
«Мяркую, такую інфармацыю ў Мінтрасе камэнтаваць немэтазгодна», — гэтак адказала на просьбу Свабоды пракамэнтаваць словы Лукашэнкі супрацоўніца прэсавай службы, якая назвалася Кацярынай, але прозьвішча сваё паведаміць адмовілася.
Аляксандр Лукашэнка сказаў, што «ўжо блізкі да таго», каб адправіць у адстаўку міністра транспарту Анатоля Сівака, падчас штогадовага звароту да народу і дэпутатаў 24 красавіка.
Ледзяная вайна і нашая віна ў армянскай рэвалюцыі: 15 цытатаў Лукашэнкі са звароту да дэпутатаў і народу
Карэспандэнт Свабоды ў размове з прэс-службай міністэрства згадаў гучны працэс 2017 году над двума адказнымі супрацоўнікамі Транспартнай інспэкцыі Мінтрасу, якія былі асуджаныя за карупцыю — ці ня з гэтым працэсам зьвязаныя словы Лукашэнкі, ці зь нейкай іншай справай?
«Ніякіх камэнтароў на гэтым пытаньні я, на жаль, не магу даваць, — адказала супрацоўніца міністэрства. — Я не ўпаўнаважаная даваць камэнтары. Зьвярніцеся да міністра».
У прыёмнай Мінтрансу адказалі, што ня могуць злучыць зь міністрам Сіваком, паколькі ён яшчэ знаходзіцца ў Нацыянальным сходзе.
Да прызначэньня міністрам транспарту і камунікацыяў у 2012 годзе Анатоль Сівак працаваў начальнікам Беларускай чыгункі, а раней — памочнікам прэзыдэнта — галоўным інспэктарам па Менску.
