У сеціве днямі зьявіўся вясёлы відэаролік «А.Г.Л. — Ніякага крызісу няма». Радыё Свабода адшукала аўтара роліка. Аўтар назваўся Яўгенам і коратка адказаў на пытаньні Свабоды.
— Што натхніла ці падштурхнула вас да стварэньня роліка?
— Проста захацеў унесьці пазытыўную нотку на тэму беларускага крызісу. Наш народ чытае і глядзіць зашмат далёка не станоўчых навінаў, усе ж разумеюць, што ня ўсё ў нашай дзяржаве добра. Але часам на гэта трэба глядзець пазытыўна.
— Ці чакалі вы такой папулярнасьці — у роліка ўжо тысячы праглядаў?
— Я не лічу, што я папулярны. Пакуль што, мабыць…
— Ці не баіцеся вы перасьледу за такі «пазытыўчык»?
— Я пастараўся зрабіць нарэзку словаў так, каб яны ня несьлі нэгатыў! Нэгатыву цяпер паўсюль шмат — і ў СМІ, і ў сацыяльных сетках, і ў жыцьці. Спадзяюся, што несьці пазытыў — гэта не злачынства?