Лінкі ўнівэрсальнага доступу

Дзявятая раніца ў Курапатах: будаўнічых работ няма, абарона трывае


Рэпартаж Свабоды зь лягеру абаронцаў Курапатаў ад будаўніцтва офіснага цэнтру.

Раніца ў лягеры абаронцаў — традыцыйна самы напружаны час, калі ўсе чакаюць вяртаньня рабочых і рыхтуюцца да супрацьстаяньня.

Аднак сёньня будаўнікі не вярнуліся і работы не аднавіліся. А сёмай гадзіне з пляцоўкі выехаў экскаватар.

Зьміцер Дашкевіч
Зьміцер Дашкевіч

— Кіроўца сказаў, што некалькі дзён работы весьціся ня будуць, але мы мусім кантраляваць сытуацыю, — паведаміў Свабодзе Зьміцер Дашкевіч. Падчас агульнай «мабілізацыі» Дашкевіч заклікаў абаронцаў заставацца ў лягеры, каб не прапусьціць момант аднаўленьня будаўніцтва.

— Ёсьць інсайдэрская інфармацыя, што разгон цяпер уладзе не патрэбен, кранаць лягер нявыгадна, — дадаў Дашкевіч.

Яшчэ ўвечары валянтэры ўладкавалі тут імправізаваную сцэну зь лягатыпам. Зь яе прамаўляюць палітыкі, на ёй граюць музыкі. Уладзімер Някляеў прыйшоў у лягер са зборнікам сваіх вершаў.

Уладзімер Някляеў
Уладзімер Някляеў

— Калі я ехаў сюды, у маршрутцы ў мяне запыталі, навошта мне гэта. А я ўпэўнены, што за вамі будучыня. Калі моладзь абароніць Курапаты, яна абароніць і Беларусь! Да таго ж падтрымаць абарону ёсьць маім грамадзянскім і мастацкім абавязкам. Нам кажуць пра 140 мэтраў да ахоўнай зоны, але тыя чыноўнікі з такім стаўленьнем да беларускай гісторыі самі павінны знаходзіцца за 140 кілямэтраў ад Беларусі, — прамовіў Някляеў, зьвяртаючыся да абаронцаў.

Ён прачытаў урывак са сваёй паэмы «Палянэз», стоячы ля бочкі з вогнішчам.

Мясцовыя жыхары працягваюць прыносіць у лягер цёплыя рэчы і ежу.

— Я дапамагала падчас абароны ў 2001 годзе, нават была затрыманая. А цяпер буду стаяць да апошняга, лягу касьцьмі, пакуль нам ня вернуць нашу прастору і ня прымуць плот і ўсю тэхніку, — кажа спадарыня Яніна, жыхарка дома № 49 па вуліцы Мірашнічэнкі.

Жанчына скардзіцца, што на пасяджэньні, якое прайшло ў адміністрацыі Першамайскага раёну Менску ўчора, людзям «затыкалі рот» і пагражалі выклікаць міліцыю. Актывісты пачалі падрыхтоўку да агульнагарадзкога мітынгу, які прызначаны на 3 сакавіка.

Паводле пляну, выпрацаванага Камітэтам абароны Курапатаў, у наступныя дні валянтэры будуць расклейваць улёткі па пад’ездах у раёне і хадзіць па кватэрах, запрашаючы людзей на мітынг.

— Важна, каб усё, што тут адбываецца, мела сэнс, прыносіла практычныя вынікі. Бо калі лягер ператворыцца ў суцэльную «тусоўку», дзе, акрамя сьпеваў і вячорак нічога ня будзе адбывацца і вырашацца, то пратэст дэградуе. Патрэбны канкрэтныя дзеяньні, — мяркуе актывіст Алесь Кіркевіч, які быў паранены падчас нападу на мінулым тыдні.

Паводле Паўла Севярынца, пратэст мусіць трываць, пакуль забудоўнік не абвесьціць пра канчатковае спыненьне ўсіх работ.

Павал Севярынец
Павал Севярынец

— Мы таксама абавязаныя дамагчыся, каб межы ахоўнай зоны былі перагледжаныя. Тэрыторыя, дзе цяпер лягер і будоўля, мае быць прызнаная ахоўнай.

Севярынец падкрэсьліў: у 2001-2002 гадах улады часам рабілі выгляд, нібыта спынілі будаваць МКАД, але неўзабаве тэхніка вярталася і капала далей.

— Выседзелі тады 8 месяцаў, не адступім і цяпер, — сказаў ён.

Яшчэ некалькі дзён таму ў лягеры раніцу сустракалі ня больш за 3 чалавекі, цяпер на ранішніх мабілізацыях прысутнічаюць тры дзясяткі абаронцаў.

9-ы дзень вахты ля Курапатаў. Фотагалерэя:

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG