Лінкі ўнівэрсальнага доступу

Распрацоўшчык з «Гомсельмашу»: Жыцьцё не спыняецца на Харкаве


На Харкаўскім трактарным заводзе

На Харкаўскім трактарным заводзе

Харкаўскі трактарны завод адмовіўся ад стварэньня сумеснага прадпрыемства па вытворчасьці збожжаўборачных камбайнаў з «Гомсельмашам» — робіць гэта зь фінскай кампаніяй Sampo Rosenlew. Што страчвае ў такім выпадку «Гомсельмаш», чый эканамічны стан і без таго цяжкі?

Збожжаўборачныя камбайны сумесна з «Гомсельмашам» Харкаўскі трактарны завод меўся вырабляць ужо сёлета — на сваіх вытворчых плошчах. У верасьні 2014 году ў Гомелі падпісалі нават адпаведны пратакол аб намерах. І вось зараз генэральны дырэктар ХТЗ Уладзіслаў Губін заявіў на брыфінгу, што прадпрыемства адмаўляецца ад партнэрства з «Гомсельмашам». Дамова падпісаная зь фінскім заводам «Sampo Rosenlew» — для ўкраінскага рынку фіны з харкаўцамі будуць вырабляць 200–250 збожжаўборачных камбайнаў у год.

Пры гэтым гендырэктар Губін патлумачыў, што «сумеснае прадпрыемства павінна быць інавацыйным», каб збожжаўборачную тэхніку можна было прадаваць ня толькі ва Ўкраіне.

Гомельскія канструктары з Навукова-тэхнічнага цэнтру камбайнабудаваньня не пагаджаюцца, што іхняя збожжаўборачная тэхніка адстае ад сусьветных узораў:

«Што тычыцца нашых распрацовак, то ў нас геаграфія пастаўкі машын надзвычай шырокая — нас ведаюць у Расеі, Кітаі, ведаюць у Эўропе, у Аргентыне ведаюць. Наша тэхніка дастаткова сучасная. Пры гэтым суадносіны кошту й якасьці знаходзяцца на належным узроўні. І калі якія-небудзь замежныя машыны, магчыма, на некалькі працэнтаў больш надзейныя, затое яны нашмат даражэйшыя».

Камбайны на складзе »Гомсельмашу», архіўнае фота

Камбайны на складзе »Гомсельмашу», архіўнае фота

Распрацоўшчык кажа, што гамельчукі могуць ствараць надзвычай надзейныя машыны — пытаньне ў тым, хто іх купіць:

«Мы можам ствараць машыны, якія дзясяткамі гадоў будуць працаваць без паломак. Дзеля гэтага патрэбныя дадатковыя сродкі таго ж самага калгасьніка. Ці патрэбна гэта? Я ведаю некалькі фактаў, калі купляюць машыны заходняй вытворчасьці — і баяцца напоўніцу іх выкарыстоўваць, толькі крыху на самых высокаўраджайных палетках — і зноў хаваюць пад навес, каб, ня дай бог, не зламалася. А нашымі як пачынаюць жніво — і да заканчэньня, бо ведаюць: калі, ня дай бог, нешта здарыцца, то цягам сутак мы ліквідуем непаладкі. Ня больш як за суткі. Абслугоўваньне і запасныя часткі ў нас у разы таньнейшыя, чым для замежных машын».

Суразмоўца ня бачыць вялікага страху ў тым, што харкаўскі завод адмовіўся ад супрацоўніцтва, бо суседняя Ўкраіна цяпер мае патрэбу ў самай разнастайнай сельскагаспадарчай тэхніцы:

«Жыцьцё не спыняецца на Харкаве. Гэта не канец сьвету. У іх вялікая патрэбнасьць у збожжа- і кармаўборачнай тэхніцы, у сеялках і веялках. Канечне, яны выбіраюць партнэраў. І прычыны выбару могуць быць розныя».

Канвэер Харкаўскага трактарнага заводу

Канвэер Харкаўскага трактарнага заводу

Адзін з кіраўнікоў «Гомсельмашу» гэтак рэагуе на адмову Харкава: вядома, шкада, што ня будзе створана сумеснае прадпрыемства з Харкаўскім трактарным заводам. Аднак вялікіх стратаў тут нібыта й нямашака:

«Мы ж яшчэ нічога не стварылі, каб губляць. Калі б было створана і згубілі — гэта іншая справа. Вядома, хацелася б і ва Ўкраіне мець вытворчасьць, і ў Расеі. Але ж гэта сумесная вытворчасьць — ну якая там частка з 250 камбайнаў? Калі камбайны будзем зьбіраць разам, то гэта ж ня поўны іх кошт, а нейкая там чацьвёртая частачка. Вядома, кепска, што губляем».

Апошнім часам вытворчае аб’яднаньне «Гомсельмаш», якое стала цяпер акцыянэрным таварыствам у складзе холдынгу, перажывае ня лепшыя часы. Страціўшы дзяржаўную падтрымку, аб’яднаньне апынулася ў цяжкім фінансавым становішчы. Айчынны парк збольшага насычаны сельмашаўскай тэхнікай — і збожжаўборачнай, і кармаўборачнай. У традыцыйных спажыўцоў — расейскіх аграрнікаў — гомсельмашаўская тэхніка запатрабаваная слаба. Расейцы нарошчваюць выпуск сваіх аналягічных машын — у Растове, у Сыбіры. Той жа расейскі завод «Ростсельмаш» таксама не сьпяшаецца ствараць сумеснае прадпрыемства па выпуску збожжавых камбайнаў, пра што два гады таму заяўлялася з урадавай трыбуны.

У так званае далёкае замежжа «Гомсельмаш» збывае пакуль малалікія партыі сваіх машын. Адсюль і цяжкае эканамічнае становішча. Даўгі прадпрыемства перавысілі 5 трыльёнаў рублёў. Сельмашаўцы даўно перайшлі на скарочаны працоўны тыдзень.

XS
SM
MD
LG