Лінкі ўнівэрсальнага доступу

Гомельская прадпрымальніца: «Нам нічога не застаецца, як ісьці на плошчу»


Цэнтральны рынак у Гомелі. Прадпрымальнікі абмяркоўваюць апошнія навіны

Цэнтральны рынак у Гомелі. Прадпрымальнікі абмяркоўваюць апошнія навіны

З пачаткам сакавіка на Гомельшчыне тысячы індывідуальных прадпрымальнікаў спынілі працу — пачаў дзейнічаць указ № 222, які абавязвае мець сэртыфікаты і таварна-транспартныя накладныя на тавары лёгкай прамысловасьці, у тым ліку й прывезеныя з Расеі.

У Рэчыцы 2 сакавіка дзясяткі прадпрымальнікаў з рынкаў «Цэнтральны», «Юбілейны», «Рытм» прыйшлі да райвыканкаму з патрабаваньнем заступіцца за іх перад вышэйшымі ўладамі.

Гаворыць лідэр прадпрымальніцкага руху з Рэчыцы Алег Шабетнік:

«Каб выканкам стаў на абарону прадпрымальнікаў, выставіў свае патрабаваньні ўраду — адкласьці дзеяньне ўказу № 222 да 2017 году, як тое зрабіла Расея. А заадно паспрыяць, каб беларускія прадпрымальнікі змаглі атрымліваць у Расеі дакумэнты на тавар з тамтэйшых аптовых рынкаў.

У Рэчыцы цяпер звыш тысячы прадпрымальнікаў, зь іх прыкладна 800 засталіся бяз працы. Тыя, хто гандлюе таварамі лёгкай прамысловасьці, практычна ўсе пазачыняліся. Засталіся толькі паасобныя прадпрымальнікі, якія гандлююць беларускімі таварамі і маюць належныя дакумэнты. Астатнія ўсе зачыніліся».

Прадпрымальнікі каля рэчыцкага райвыканкаму

Прадпрымальнікі каля рэчыцкага райвыканкаму

Рэчыцкая прадпрымальніца Алена, маці траіх малалетніх дзяцей, кажа, што цяпер яе сям’я вымушана жыць на дзяржаўную дапамогу дзецям — гэта крыху больш як 3 мільёны на пяць душ:

«Мужа зрабілі дармаедам, а цяпер і я стала дармаедкай. У мяне вышэйшая адукацыя — я б з задавальненьнем пайшла працаваць. Але куды? Усюды скарачэньні, спыняецца вытворчасьць. Усюды кланы сямейныя. Глянь на той жа наш мэтызны завод: тата, мама, сваты, браты, сёстры — ня ўлезеш, калі няма „валасатай рукі“. Я б з прыемнасьцю сядзела ў цёплым кабінэце — але куды ісьці?»

Спусьцелы рэчыцкі рынак

Спусьцелы рэчыцкі рынак

Сотні дробных бізнэсоўцаў засталіся бяз працы і ў абласным цэнтры. У гандлёвым цэнтры «Сакрэт» на стыхійным сходзе, які адбыўся напярэдадні, тамтэйшыя гандляры разам з прадстаўнікамі Цэнтральнага рынку скандавалі:

«Указ № 222 — адмяніць, адмяніць, адмяніць!»

Прадпрымальніца Сьвятлана, якая пасьля шматгадовай працы зачыніла свой ралет у гандлёвым цэнтры да лепшых часоў, ня можа зразумець лёгіку ўладаў у дачыненьні да прадпрымальнікаў:

«Урад паставіў нас у патавую сытуацыю: мы працаваць ня можам — нас выганяюць на вуліцу. Нашы рэалізатары, зь якімі мы працавалі доўгія гады, — яны таксама ідуць на вуліцу. У краіне, дзе няма працоўных месцаў, дзе заводы пераходзяць на трох- ці чатырохдзёнку, а ў людзей няма грошай на самае неабходнае і няма працоўных месцаў, — нас выкідаюць на вуліцу. Пра што думае ўрад краіны? Я сто пяты раз пытаюся ў нашых дзяржаўнікаў: для каго пішуцца такія законы, на якіх пазначана, што яны нібыта для народу? Для якога народу? Мы што — не народ?»

Напярэдадні ўступленьня ў сілу ўказу № 222 намесьнік міністра эканомікі Дзьмітры Крутой па тэлебачаньні заявіў, што дакумэнт адправяць на дапрацоўку. І прадпрымальнікі да падпісаньня канчатковай вэрсіі ўказу нібыта могуць працаваць спакойна — іх ня будуць штрафаваць за адсутнасьць дакумэнтаў. Аднак прадпрымальнікі даюць мала веры такім расповедам чыноўнікаў.

Цэнтральны рынак у Гомелі

Цэнтральны рынак у Гомелі

Прадпрымальнік Юры, які мае дробны гандлёвы бізнэс,так рэагуе на запэўніваньні чыноўніка:

«Словы словамі, а паперы паперамі. Штрафаў ніхто не адмяняў, і гэтага баімося».

Спадарыня Валянціна кажа, што індывідуальныя прадпрымальнікі пастаўленыя ў такія ўмовы, што ні самім жыць, ні дзяцей вучыць:

«Стаім мы — беспрацоўныя. Нам няма чым заплаціць за вучобу — дзеці вучацца на платнай аснове. Няма грошай, каб заплаціць за вучобу. Нам нічога не застаецца, як ісьці на плошчу і патрабаваць адмены гэтага ўказу. Іншага выйсьця проста няма».

На Гомельшчыне цяпер 28 тысяч індывідуальных прадпрымальнікаў. Паводле зьвестак прадпрымальніцкіх структураў, 80 адсоткаў зь іх 1 сакавіка спынілі працу. Наўрад ці цэнтры занятасьці здольныя будуць знайсьці ім працоўныя месцы — пры цяперашнім крызісным стане эканомікі. Значыць, гэтыя людзі папоўняць шэрагі так званых «дармаедаў», зь якімі ўлады наважаны змагацца. Апрача таго, самыя сьціплыя падлікі паказваюць, што бюджэт толькі ў Гомельскай вобласьці страціць сама меней 30 мільярдаў рублёў падаткаў.

XS
SM
MD
LG