Лінкі ўнівэрсальнага доступу

Галоўнае пытаньне Лукашэнка ў Астане ня вырашыў, — Класкоўскі


Аляксандар Класкоўскі

Аляксандар Класкоўскі

Аляксандар Лукашэнка на сустрэчы з Уладзімерам Пуціным і Нурсултанам Назарбаевым у Астане ня змог вырашыць галоўнае для сябе пытаньне — пытаньне аб атрыманьні новых эканамічных субсыдыяў ад Расеі.

Такую думку ў інтэрвію Радыё Свабода выказаў палітычны аналітык Аляксандар Класкоўскі.

«Пакуль мы ня маем поўнай інфармацыі (пра ход перамоваў. — РС) і, магчыма, поўная інфармацыя публічна і ня зьявіцца. Таму што адчуваньне такое, што галоўнага пытаньня Лукашэнка там ня вырашыў. Бо зь ягоных вуснаў прагучала, што 8 траўня тры прэзыдэнты сустрэнуцца ў Маскве і, маўляў, там мы яшчэ раз вернемся да пытаньняў, а тым часам урады прапрацуюць іх.

Калі казаць канкрэтна, то я думаю, што беларускі кіраўнік, безумоўна, узьнімаў пытаньне пра субсыдыі з боку Расеі, пра нейкія прэфэрэнцыі ў зьвязку з тым, што Эўразійскі саюз стартаваў далёка ня так удала, як гэта малявалася некалі, — кажа Класкоўскі. — Таму я думаю, што Лукашэнка ставіў, груба кажучы, пытаньне праплаты эўразійскай інтэграцыі — інакш за што мы змагаліся, навошта мы падпісвалі гэтыя паперы, дэлегавалі нейкую частку паўнамоцтваў? Але, відаць, у Расеі, у Пуціна цяпер не такая сытуацыя, каб нейкія занадта шчодрыя рабіць падарункі, і таму гэтую праблематыку спусьцілі на ўзровень урадаў».

Зьвяртае на сябе ўвагу тое, што ўчора, яшчэ да прыезду ў Астану Ўладзімера Пуціна, прайшла двухбаковая сустрэча Аляксандра Лукашэнкі і Нурсултана Назарбаева. На думку Класкоўскага, у Лукашэнкі і Назарбаева ёсьць глеба для «нейкіх закулісных размоваў».

І Назарбаеў, і Лукашэнка, я думаю, адчуваюць пэўны халадок між лапатак у гэтай сытуацыі, умоўна кажучы, „пасьля Крыму“

«Па-першае, іх аб’ядноўваюць аднолькавыя беды ў зьвязку з эўразійскай інтэграцыяй, якая не дала тых выгодаў, якія ўяўляліся ў свой час. Па-другое, ёсьць вялікія засьцярогі проста ў пляне нацыянальнай бясьпекі, таму што цяпер, ва ўсякім разе, нейкія нацыяналістычныя сілы, адпаведныя інтэрнэт-рэсурсы ў Расеі ўжо ўздымаюць пытаньне і пра паўночныя вобласьці Казахстану, якія нібыта гістарычна павінны належаць Расеі, і пра тое, што Беларусі бальшавікі ў свой час дарэмна аддалі ўсходнія вобласьці. Таму і Назарбаеў, і Лукашэнка, я думаю, адчуваюць пэўны халадок між лапатак у гэтай сытуацыі, умоўна кажучы, „пасьля Крыму“, калі стала зразумела, што Расея ў пэўных абставінах можа дзейнічаць абсалютна брутальна ў прасоўваньні сваёй канцэпцыі „русского мира“. Так што ёсьць Лукашэнку з Назарбаевым пра што пагаварыць — і пра тое, як выціснуць з Пуціна болей эканамічных прэфэрэнцыяў, і як супрацьстаяць магчымай экспансіі „русского мира“», — кажа экспэрт.

Але разам з тым Класкоўскі падкрэсьлівае, што ніякага «беларуска-казахстанскага фронту» супраць Пуціна, безумоўна, ня будзе.

«Могуць быць нейкія часовыя сытуацыйныя хаўрусы, калі супадаюць інтарэсы. Але, па вялікім рахунку, кожны з гэтых трох аўтарытарных кіраўнікоў цягне коўдру ў свой бок, кожны думае, як абхітрыць іншых партнэраў. І таму ў Лукашэнкі з Назарбаевым няма поўнага даверу», — лічыць аналітык.

Уладзімер Пуцін, Аляксандар Лукашэнка, Нурсултан Назарбаеў у бібліятэцы першага прэзыдэнта Казахстана ў Астане

Уладзімер Пуцін, Аляксандар Лукашэнка, Нурсултан Назарбаеў у бібліятэцы першага прэзыдэнта Казахстана ў Астане

Тым больш Казахстан мае больш свабоды для геапалітычнага манэўра і, у адрозьненьне ад Беларусі, валодае сыравіннымі рэсурсамі.

«Лукашэнка значна болей залежыць ад Масквы, чым Назарбаеў. Я думаю, што Пуцін у гэтай сытуацыі дзейнічае паводле клясычнага імпэрыялістычнага прынцыпу „падзяляй ды ўладар“ — ён кожнаму з сваіх партнэраў будзе нешта абяцаць, а зь іншага боку — намякаць, што калі ня хочаце па-добраму, мы можам і іначай паставіць пытаньне», — кажа Класкоўскі.

Цікава, што ў Астане двухбаковай сустрэчы Лукашэнкі з Пуціным не адбылося — прынамсі, пра гэта нічога не паведамлялася, кажа экспэрт.

Уладзімер Пуцін, Нурсултан Назарбаеў, Аляксандар Лукашэнка на фоне Астаны

Уладзімер Пуцін, Нурсултан Назарбаеў, Аляксандар Лукашэнка на фоне Астаны

Класкоўскі не выключае, што кароткая сустрэча кіраўнікоў Расеі і Беларусі яшчэ можа адбыцца, але калі гэтага ня будзе, то, значыць, ім, на думку экспэрта, проста няма пра што дадаткова гаварыць.

«Ня так даўно, 3 сакавіка, была сустрэча ў межах саюзнай дзяржавы, і на тым саміце, я думаю, Лукашэнка ставіў аналягічныя пытаньні — што не працуе Эўразійскі саюз, што бар’еры перашкаджаюць, што сьціскаецца расейскі рынак, і ўрэшце — што проста дайце нейкую пазыку. З таго часу, відаць, Масква не сасьпела да нейкіх паўнавартасных адказаў на гэтыя пытаньні, і таму няма тэмы для гаворкі».

Палітоляг-міжнароднік Андрэй Фёдараў таксама лічыць, што адсутнасьць асабістай сустрэчы Лукашэнкі і Пуціна ў Астане можа тлумачыцца тым, што ў такой сустрэчы проста не было неабходнасьці.

«Тут цяжка сказаць, у чым тут справа. Гэта такія здагадкі, як у савецкі час з тым, хто дзе стаіць на Маўзалеі і як гэта суадносіцца з блізкасьцю да першай асобы», — адзначыў ён у размове са Свабодай.

Паказаць камэнтары

XS
SM
MD
LG