Лінкі ўнівэрсальнага доступу

Магерыні адказала былым беларускім палітвязьням


Фэдэрыка Магерыні

Фэдэрыка Магерыні

«Эўразьвяз чакае, што Беларусь прадэманструе павагу да правоў чалавека», — напісала Вярхоўны прадстаўнік ЭЗ па зьнешняй палітыцы і палітыцы бясьпекі.

Вярхоўны прадстаўнік ЭЗ па зьнешняй палітыцы і палітыцы бясьпекі Фэдэрыка Магерыні адказала на калектыўны ліст былых беларускіх палітвязьняў Алеся Бяляцкага, Андрэя Саньнікава і Міколы Статкевіча.

Ліст палітвязьняў быў напісаны ў кастрычніку. У гэтым лісьце Бяляцкі, Саньнікаў і Статкевіч заклікалі Эўразьвяз не здымаць зь Беларусі санкцыі да выкананьня ўсіх умоваў ЭЗ па нармалізацыі адносінаў, у тым ліку рэабілітацыі былых палітвязьняў і значнага паляпшэньня сытуацыі з правамі чалавека.

Адказ Магерыні апублікаваў на сваёй старонцы ў Фэйсбуку Бяляцкі.

Магерыні ў сваім лісьце кажа, што ЭЗ будзе надалей настойваць на рэабілітацыі экс-палітвязьняў.

«Я цалкам разумею тое становішча, у якім вы знаходзіцеся разам зь іншымі былымі палітвязьнямі, чые грамадзянскія і палітычныя правы не адноўленыя. І мы будзем пасьлядоўна працягваць уздымаць гэтае пытаньне ў кантактах зь беларускімі ўладамі», — гаворыцца ў лісьце.

Магерыні падкрэсьлівае, што правы чалавека, дэмакратыя, вяршэнства закону і свабода выказваньняў і меркаваньняў — неад’емная частка ўдзелу ЭЗ у дыялёгу зь беларускімі ўладамі.

«ЭЗ адпаведным чынам адрэагавала на ініцыятыву Беларусі і чакае ад яе, што Беларусь прадэманструе павагу да правоў чалавека і фундамэнтальных свабодаў», — піша яна.

Магерыні таксама кажа, што ЭЗ будзе надалей аказваць моцную падтрымку грамадзянскай супольнасьці.

Паказаць камэнтары

XS
SM
MD
LG