13 студзеня ў Маскоўскім судзе Берасьця пачаўся разгляд скаргі актывіста КХП БНФ Алеся Чахольскага на рашэньне камісіі Берасьцейскага аблвыканкаму, якая прызнала экстрэмісцкімі кнігу Зянона Пазьняка «Добрая фатаграфія», а таксама напісаную тым жа Зянонам Пазьняком і Валерам Буйвалам кнігу «Абарона Курапатаў. Народны мэмарыял».
Разглядае пазоў актывіста судзьдзя Андрэй Грушко. Па выніках першага дня працэсу Алесь Чахольскі кажа пра палітычны характар суду.
«Па-першае, на суд не зьявіліся гэтак званыя экспэрты, якія вырашылі, што кнігі Зянона Пазьняка нібыта экстрэмісцкія. Кажу пра экспэрта зь „Белай Русі“ і супрацоўніка ідэалягічнага аддзелу аблвыканкаму. Відаць, яны палічылі, што на суд ісьці ім ня трэба, і нават не даслалі ніякага тлумачэньня. Прычым выявілася, што суд ня ведае адрасу гэтай экспэртнай камісіі, яе нібыта не існуе, і суд гэта не хвалюе. То бок відавочна фармальнае стаўленьне суду да разгляду маёй скаргі.
Другая прычына — рашэньні адносна маіх хадайніцтваў. Прыкладам, я хадайнічаў, каб суд прызнаў трэцяй асобай у канфлікце Юрася Беленькага. Мае аргумэнты былі простыя і законныя: фатаздымкі Юрася Беленькага зьмешчаныя ў кнігах Зянона Пазьняка, але кнігі канфіскаваныя, і яму як аўтару нават не дасталася ніводнага экзэмпляру. Але суд гэтае хадайніцтва не задаволіў, Юрась Беленькі будзе заслуханы толькі як сьведка.
І трэцяе — у суду нават не аказалася экзэмпляраў кніг, пра якія ідзе спрэчка. І як жа судзьдзя зьбіраўся разглядаць маю скаргу?
Таму я і лічу, што працэс палітызаваны і вынік яго можна прадказаць», — распавёў актывіст КХП-БНФ Алесь Чахольскі.
Алесь Чахольскі дамагаецца адмены рашэньня экспэртнай камісіі аб прызнаньні экстрэмісцкімі кніг Зянона Пазьняка «Добрая фатаграфія» і «Абарона Курапатаў. Народны мэмарыял», напісанай разам з Валерам Буйвалам, а таксама вяртаньня кніг, якія былі адабраныя на беларуска-польскай мяжы. Працяг разгляду скаргі актывіста КХП-БНФ Алеся Чахольскага адбудзецца 21 студзеня.
