Пра гэта Марына Лобава паведаміла сайту «Беларускі дакумэнтацыйны цэнтар»:
«Сёньня, 4 лістапада, а 08.10 раніцы прыйшлі супрацоўнікі крымінальнага вышуку. Шукалі Эдуарда. Хацелі зайсьці ў кватэру і агледзець, але праз тое, што ордэра на ператрус у іх не было, я іх не пусьціла. Пыталіся, калі апошні раз бачыла сына і дзе ён знаходзіцца.
Сам візыт міліцыі нечаканым ня быў, бо наведваюць яны мяне ня першы раз. Але ў гэты раз зьдзівілі тым, што яны шукаюць Эдуарда за злачынства, учыненае паводле арт. 206 Крымінальнага кодэксу Рэспублікі Беларусь (рабаваньне), а не паводле арт. 421 Крымінальнага кодэксу Рэспублікі Беларусь (невыкананьне патрабаваньняў прэвэнтыўнага нагляду) і арт. 422 Крымінальнага кодэксу Рэспублікі Беларусь (ухіленьне ад прэвэнтыўнага нагляду). Растлумачыць неадпаведнасьць цяперашняга і ранейшага абвінавачаньняў супрацоўнікі не змаглі. Сказалі, што ім далі паперы, і яны пайшлі шукаць. Таму я пакуль ня ведаю, ці гэта звычайны нізкі ўзровень прафэсійнай падрыхтоўкі супрацоўнікаў МУС і няведаньне артыкулаў Крымінальнага кодэксу, ці на сына зноў сфабрыкавалі новую крымінальную справу».
Эдуард Лобаў разам са старшынём «Маладога фронту» Зьмітром Дашкевічам быў затрыманы ў Менску 18 сьнежня 2010 году — гэта было прэвэнтыўным захадам спэцслужбаў і міліцыі напярэдадні выбараў прэзыдэнта, якія праходзілі на наступны дзень. 22-гадовага актывіста прызналі вінаватым паводле часткі 3 артыкула 339 Крымінальнага кодэксу — «асабліва злоснае хуліганства» — і асуджаны на чатыры гады зьняволеньня ў калёніі ўзмоцненага рэжыму.
Выйшаў на волю 18 сьнежня 2014 году.
У ліпені 2015 году ў сеціве зьявілася відэа, на якім Эдуард Лобаў распавядае, што змагаецца ва Ўкраіне супраць прарасейскіх сэпаратыстаў.
