У менскім кінакомплексе Silver Screen, што ў гандлёвым цэнтры Galileo, адбылося ўзнагароджаньне пераможцаў чацьвёртага фэстывалю мабільных трэйлераў Smartfilm — кароткіх кінастужак, зьнятых на тэлефон.
Ініцыятарам імпрэзы выступіў апэратар мабільнай сувязі Velcom.
Да конкурсу было дапушчана 139 працаў, а пераможцаў выбіралі ў 10 намінацыях. Дзьве працы зь дзесяці былі па-беларуску.
У намінацыі «Баявік» фільм-пераможца называецца «Кур’ер», зьняў яго Міхаіл Пархоменка. Усе героі фільму гаварылі па-беларуску, сцэнар пабудаваны на беларускіх падзеях.
У намінацыі «Подых Бацькаўшчыны» перамог беларускамоўны фільм «Крок», які зьняў Максім Таранкоў.
Гран-пры фэстывалю атрымаў фільм «Ціхая песьня» Вольгі Зяновай.
Сябра журы, вядомы кінакрытык Максім Жбанкоў пажадаў усім удзельнікам больш здымаць на беларускай мове і пра беларускія рэаліі.
Усе ўдзельнікі фэстывалю атрымалі каштоўныя прызы — гаджэты.