Лінкі ўнівэрсальнага доступу

«У 1994 годзе далі сябе падмануць? Дык зараз атрымоўвайце тое, што заслужылі». Менчукі пра рэформы


«Ці патрэбныя Беларусі эканамічныя рэформы? Калі так, то ці здольныя ажыцьцявіць іх тыя асобы, якія кіруюць цяпер краінай?». Адказваюць менчукі.

Супрацоўніца страхавой кампаніі: «Усюды патрэбныя рэформы ў нашай краіне. У нас цалкам трэба пераглядаць гаспадараньне і ў гандлі, і ў прадпрымальніцтве, і ў банкаўскай сфэры — усюды цалкам. Можа гэта зрабіць і цяперашняе кіраўніцтва. Чаму не? Раней рабілі, то могуць і новае прыдумляць і выкарыстоўваць. І ўсё будзе добра».

Будаўнік старэйшых гадоў: «Калі б была добрая эканоміка, то і заробкі былі б добрыя. Але вялікі плюс, што ў нас ціха і спакойна ў краіне, што ёсьць парадак і дысцыпліна. Гэта плюс для нас, нашых сем’яў і дзяцей».

Маладая жанчына зь дзецьмі: «Вядома, грошай хацелася б пабольш. Бо ўсё вельмі дорага, заробкі малыя і, фактычна, заробак аднаго дарослага чалавека ідзе на аплату арэнды кватэры. А трое дзяцей — і ў выніку жывем на дзіцячыя выплаты. Ці зьменяць што ўлады — ня ведаю».

Пэнсіянэр: «Адносна жыльля трэба думаць, бо гэта самае галоўнае. А таксама заробкі ўпалі, і вось я, пэнсіянэр, дапамагаю сваім дзецям. Працую, бо інакш не пражыць».

Былая інжынэрка: «Ведаеце, якія я зьмены хачу? Ну, колькі Лукашэнка будзе пры ўладзе? Хоць любімы, хоць нелюбімы — ну трэба ж Канстытуцыю не парушаць! Калі той рэфэрэндум быў, чаму ўсё так сталася? Не, ну нельга ж так. Як ёсьць Канстытуцыя, то — ну, незаменных няма».

Студэнт: «Нікому і ніколі не пашкодзіць нейкая рэформа. Заўсёды ёсьць тое, што можна зрабіць лепш. Заўсёды ёсьць магчымасьць зрабіць лепш. Што тычыцца ўлады, то галоўнае — жаданьне. Трэба, каб кіраўніцтва само паставіла перад сабой гэтае пытаньне, ці гатовае яно нешта зьмяніць у сабе і ў краіне».

Пэнсіянэр: «У наш час усё патрэбна, і рэформы таксама. Што менавіта не магу сказаць, бо я не эканаміст. А ўлады — пэўна ж стараюцца, каб было лепш. Будзем чакаць».

Прадпрымальнік: «Вядома. Перадусім для прыватнага бізнэсу трэба нармальныя ўмовы стварыць — нас душаць, як могуць. І вы, пэўна, ведаеце, што чалавек, які зараз узначальвае ўладу — ён, фактычна, нелегітымны. Ён прызначае судзьдзяў — ні ў якія вароты ня лезе. Павінныя быць незалежныя галіны ўлады. Вось мы з вамі размаўляем па-беларуску, а беларуская мова ў нас у загоне. Ці гэта нармальна? Я лічу, што не. І гэты кіраўнік улады — чалавек савецкай сыстэмы — наўрад ці ён штосьці хоча і можа зьмяніць. Ёсьць толькі імітацыя дзейнасьці. Усе гэта даўно зразумелі, але ўжо нічога ня зьменіш. У 1994 годзе далі сябе падмануць — зараз атрымоўвайце тое, што заслужылі. Як кажуць — кожны народ мае таго кіраўніка, якога заслугоўвае».

XS
SM
MD
LG