Лінкі ўнівэрсальнага доступу

Human Rights Watch: «Беларусь павінна скончыць гэты фарс і вызваліць Анамурадава»


Чары Анамурадаў

Чары Анамурадаў

Праваабарончая арганізацыя Human Rights Watch патрабуе ад уладаў Беларусі вызваліць туркмэнскага дысыдэнта Чары Анамурадава.

Месяц таму яго затрымалі ў Нацыянальным аэрапорце «Менск».

Цяпер Чары Анамурадаў утрымліваецца ў менскім СІЗА-1 на вуліцы Валадарскага, яму пагражае экстрадыцыя ў Туркмэністан, дзе ён стане ахвярай катаваньняў у зьняволеньні, паведамляе Праваабарончы цэнтар «Вясна».

Беларускія ўлады затрымалі былога журналіста Чары Анамурадава па просьбе туркмэнскага ўраду аб экстрадыцыі. Ён мае швэдзкае і расейскае грамадзянства.

«Туркмэнскія ўлады маюць доўгую гісторыю бязьлітаснага перасьледу крытыкаў рэжыму, у тым ліку журналістаў, — сказала намесьніца дырэктара Human Rights Watch па Эўропе і Цэнтральнай Азіі Рэйчэл Дэнбэр. — Калі Анамурадаў вернецца ў Туркмэністан, няма сумневаў у тым, што ён стане ахвярай несправядлівага зьняволеньня і парушэньняў з боку ўладаў».

Паводле Дэнбэр, беларускія ўлады ня маюць законных падставаў далей трымаць Анамурадава пад вартай.

«Ён атрымаў прытулак у Швэцыі, каб абараніцца ад ураду, ад імя якога, як яны самі сьцьвярджаюць, улады Беларусі і дзейнічаюць. Яны павінны неадкладна вызваліць яго і дазволіць яму вярнуцца ў Швэцыю.

Анамурадаў знаходзіцца пад вартай на працягу месяца. Затрыманьне з боку беларускіх уладаў грунтуецца на састарэлым сьпісе вышуку, атрыманым ад ураду, які перасьледуе журналістаў і, у прыватнасьці, раней перасьледаваў самога Анамурадава, — сказала Дэнбэр. — Беларусь павінна скончыць гэты фарс і вызваліць Анамурадава».

Паказаць камэнтары

XS
SM
MD
LG