Лінкі ўнівэрсальнага доступу

«Ярмошына! Прыйшоў ваш час падманваць нас!». У Баранавічах прайшоў пікет кандыдатаў ад АГП і БНФ


Мікалай Чарнавус-старэйшы

Мікалай Чарнавус-старэйшы

Баранавіцкія апазыцыйныя кандыдаты Мікалай Чарнавус-старэйшы (ПБНФ) і Мікалай Чарнавус-малодшы (АГП) зладзілі пікет зь лёзунгам, скіраваным да старшыні Цэнтральнай выбарчай камісіі Лідзіі Ярмошынай.

«Ярмошына! Прыйшоў Ваш час падманваць нас!» Пад плякатам з такім надпісам адбываўся пікет кандыдатаў у дэпутаты парлямэнту.

Мікалай Чарнавус-старэйшы лічыць, што выбары будуць на 100% сфальсыфікаванымі.

«Зараз сапраўды пачынаецца яе [Ярмошынай] час. Старшыні камісій і яна будуць завязаныя на тым, каб падтасаваць бюлетэні, — сказаў ён Свабодзе. — Мы ня верым у тое, што выбары пройдуць чэсна».

У той жа час сама Лідзія Ярмошына тыдзень таму казала, што выбары ў Беларусі праходзяць усё больш «цывілізавана».

«Мы праводзім выбары ўсё больш дасканала, яны становяцца ўсё больш цывілізаванымі, — сказала Ярмошына. — Гэта ветлівасьць, памяркоўнасьць да чужога іншадумства».

У Баранавічах утвораныя дзьве выбарчыя акругі. Мікалаі Чарнавусы балятуюцца па розных. Сярод супернікаў Чарнавуса-старэйшага — цяперашняя дэпутатка Палаты прадстаўнікоў Вольга Палітыка. Таксама, на ягонай Баранавіцкай-Заходняй акрузе вылучаюцца кандыдатамі сябра БСДП(Г) Васіль Кармановіч ды сябра партыі левых «Справядлівы сьвет» Уладзімер Шэстак.

На Баранавіцкай-Усходняй выбарчай акрузе, апроч Чарнавуса-малодшага, зарэгістраваныя кандыдатамі сябра партыі левых «Справядлівы сьвет» Чэслаў Гузоўскі, беспартыйны дырэктар прыватнага прадпрыемства Дзьмітры Аўгуст ды беспартыйная першы прарэктар Баранавіцкага ўнівэрсытэту Тацяна Якубовіч.

Хоць Чарнавус-старэйшы ня верыць у справядлівыя выбары, ён ня будзе зь іх здымацца. Ён мяркуе «ісьці да канца, бо зроблена шмат працы, і людзі потым будуць наракаць, што зьняліся».

XS
SM
MD
LG