Лінкі ўнівэрсальнага доступу

Жыхары адной з вуліц у Воршы дамагліся, каб будоўлю пад іхнымі вокнамі спынілі


Замест дрэваў быў бы навабуд

Замест дрэваў быў бы навабуд

Будоўля адміністрацыйна-гандлёвага цэнтру ў Воршы каля дому № 10 па вуліцы Сямёнава адменена.

Пра гэта карэспандэнту Свабоды паведамілі ў Аршанскім райвыканкаме.

Начальнік землеўпарадкавальнай службы Аршанскага райвыканкаму Ігар Фядорчанка сказаў:

«Прынятае рашэньне аб выманьні ўчастку. То бок участак забраны і там ня будзе абʼекта».

На пытаньне, ці сталі прычынай такога рашэньня пратэсты мясцовых жыхароў, спадар Фядорчанка адказаў так:

«Прычына палягае ў тым, што парушана заканадаўства: несвоечасова пачалі будаўніцтва, прапушчаныя тэрміны будаўніцтва».

Плот з шыльдай прастаяў каля двух тыдняў. 20 красавіка ў мікрараёне зьявіліся рабочыя, якія дэмантавалі ўсё, што нагадвала пра будаўнічую пляцоўку. Ад плянаў наконт адміністрацыйнага-гандлёвага цэнтру не засталося і знаку.

Нязьдзейсьненыя пляны

Нязьдзейсьненыя пляны

Мясцовыя жыхары ўпэўненыя, што паспрыяла гэтаму іхная настойлівасьць: за пару тыдняў яны некалькі разоў накіроўвалі сваіх прадстаўнікоў у райвыканкам, зьвярталіся да журналістаў і напісалі зь дзясятак лістоў у розныя арганізацыі — ад санстанцыі да пракуратуры.

Фрагмэнт калектыўнага ліста

Фрагмэнт калектыўнага ліста

Людзі абурыліся, што дзеля будоўлі трэба высекчы больш за два дзясяткі дрэваў, якія яны пасадзілі ў сябе пад вокнамі. Атрымаўся невялікі сквэрык, які даваў цень. А тут выходзіць, што замест бярозак проста пад вокнамі мае вырасьці двухпавярховая будыніна.

Замест дрэваў быў бы навабуд

Замест дрэваў быў бы навабуд

Толькі тады, калі за домам пачалі майстраваць плот, жыхары даведаліся, што пляц пад іхнымі вокнамі яшчэ ў 2013 годзе выкупіў прыватны прадпрымальнік. Праўда, на шыльдзе з плянам будучага абʼекта значыўся іншы адрас: замест вуліцы Сямёнава — вуліца 60-годзьдзя БССР.

Вул. Сямёнава, 10, Ворша
Вул. Сямёнава, 10, Ворша

Насельнікі дома № 10 па вуліцы Сямёнава ўсьцешаныя перамогай, але лічаць, што супакойвацца яшчэ рана. Яны не выключаюць, што ў першапачатковы праект гаспадар можа ўнесьці нейкія папраўкі, і будоўля распачнецца зноў. Людзі абмяркоўваюць, як бы набыць той пляц ва ўласнасьць каапэратыва, якому належыць дом. А жыхары іншых дамоў тым часам ходзяць да іх «пераймаць досьвед», бо лічаць, што ад падобных будоўляў пад вокнамі ніхто цяпер не застрахаваны.

Сёньня ад плота не засталося і знаку

Сёньня ад плота не засталося і знаку

XS
SM
MD
LG