На сайце курсаў беларускай мовы «Мова нанова» запрацавала біржа працы. Гэта адмысловая дошка бясплатных абвестак, дзе беларускамоўныя могуць знайсьці ці прапанаваць паслугі.
«Гэтую ідэю прапанаваў адзін са слухачоў курсаў, — кажа арганізатар „Мовы нанова“ Глеб Лабадзенка. — Сапраўды, сярод нашых студэнтаў — людзі самых розных прафэсіяў. І калі мы хочам падтрымаць беларускамоўнага прадпрымальніка, то можам знайсьці яго на дошцы абвестак у рубрыцы „Біржа працы“».
Глеб Лабадзенка лічыць, што беларускамоўныя людзі вартыя таго, каб атрымліваць матэрыяльныя бонусы, нават калі гутарка вядзецца пра набыцьцё сантэхнікі ці перавоз мэблі на лецішча:
«Мы, беларусы, вельмі практычныя людзі. І мы павінны адчуваць выгаду. Некаторыя пытаюць: а што нам будзе, калі мы загаворым па-беларуску? А будзе вось што. Мы ўжо зрабілі першы крок — увялі бонусную сыстэму для студэнтаў курсаў „Мова нанова“, у нас ужо больш за 70 партнэраў, якія даюць добрыя зьніжкі ўладальнікам студэнцкіх білетаў курсаў „Мова нанова“. Другі крок — гэта біржа працы, фактычна беларускамоўная дошка абвестак, для таго каб паслугі і спажыўцы знаходзілі адно аднаго. Кожны з нас кожны дзень нешта набывае, зьвяртаецца па нейкія паслугі. Вось уявіце, што ўсё гэта можна рабіць з прысутнасьцю беларускай мовы. Вось да чаго мы імкнёмся».
Як адзначае Глеб Лабадзенка, на біржу працы выстаўляюцца прапановы, не абавязкова зьвязаныя з мовай:
«Так, ёсьць прапановы перакладчыкаў, рэпэтытараў, журналістаў. Але ж сэнс у тым, каб тут былі ўсе. Вось, напрыклад, ёсьць праблема знайсьці беларускамоўную няню. Спадзяюся, што наша дошка абвестак дапаможа з гэтым. Мы часта карыстаемся паслугамі кіроўцаў. І шмат хто з задавальненьнем замовіць беларускамоўнага. Тое самае з будаўнікамі, малярамі. Лепш заплаціць беларускамоўнаму чалавеку. Гаворка пра тое, што людзі павінны адчуць, што мова — гэта выгадна. Насамрэч, ёсьць беларускамоўныя прадпрымальнікі, бізнэсоўцы, проста супрацоўнікі. Іх вялізарная колькасьць. Дык давайце падтрымліваць адно аднаго. Каб беларускамоўныя людзі багацелі, рабіліся больш заможнымі. Каб астатнія глядзелі і думалі: „О, беларускамоўны кіроўца, і няма адбою ад кліентаў. А я стаю і чакаю“».
Умова для разьмяшчэньня бізнэс-прапановы на сайце «Мова нанова» вельмі простая — жаданьне падаць абвестку па-беларуску і гатоўнасьць кантактаваць зь беларускамоўнымі кліентамі.
