Лінкі ўнівэрсальнага доступу

Абама: Ня варта мяшаць санкцыі за Крым зь іншымі праблемамі 


Барак Абама
Барак Абама

Прэзыдэнт ЗША Барак Абама на сваёй апошняй прэсавай канфэрэнцыі 18 студзеня сказаў, што Злучаныя Штаты не павінны забывацца чаму яны ўвялі санкцыі супраць Расеі пасьля анэксіі Крыму і расейскай падтрымкі сэпаратыстаў на ўсходзе Ўкраіны.

Заява Абамы прагучала празь некалькі дзён пасьля заявы абранага прэзыдэнта ЗША, Дональда Трампа, які сказаў, што ЗША ў будучыні могуць зьняць санкцыі, калі Расея «вельмі значна» скароціць свае ядзерныя запасы.

Абама адзначыў, што варта аддзяляць ад іншых пытаньняў санцыі, уведзеныя супраць Расеі пасьля анэксіі Крыму ў 2014 годзе. «Гэта пэўна найлепш паслужыла б ня толькі амэрыканскім інтарэсам, але таксама інтарэсу захаваньня міжнародных нормаў, калі б мы былі ўпэўненыя, што ня блытаем з цэлым шэрагам іншых пытаньняў, чаму былі ўведзеныя гэтыя санкцыі».

Трамп, які мае зьмяніць Абаму 20 студзеня, казаў, што хоча палепшыць адносіны з Расеяй, якія сапсаваліся ў сувязі з канфліктамі ва Ўкраіне і Сырыі.

Барак Абама таксама пракамэнтаваў адносіны з Расеяй на сваёй апошняй прэсавай канфэрэнцыі на пасадзе прэзыдэнта ЗША. Паводле яго, ЗША заўсёды імкнуліся да канструктыўных амэрыканска-расейскіх адносінаў. «Я думаю што ў інтарэсах ЗША, у інтарэсах усяго сьвету, каб у нас з Расеяй былі канструктыўныя адносіны», — сказаў прэзыдэнт ЗША.

Пасьля вяртаньня Ўладзіміра Пуціна на пасаду прэзыдэнта ў Расеі пачалася эскаляцыя антыамэрыканскай рыторыкі, сказаў Абама. Вяртаньне да духу суперніцтва часоў халоднай вайны ўскладніла адносіны паміж краінамі, адзначыў прэзыдэнт ЗША.

Абама таксама сказаў, што Расея не прадэманстравала зацікаўленасьці ў працягу перамоваў па скарачэньні ядзерных арсэналаў пасьля апошняй дамоўленасьці ў гэтай сфэры. Абама выказаў надзею, што абраны прэзыдэнт Дональд Трамп зможа дасягнуць прагрэсу ў пытаньнях ядзернага раззбраеньня.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG