Лінкі ўнівэрсальнага доступу

logo-print

Беларускі рубель таньнее не па днях, а па гадзінах


Супрацоўніца банку мяняе курсы валют

Супрацоўніца банку мяняе курсы валют

У абменных пунктах беларускіх банкаў распачаўся падвышаны попыт на валюту. Пад вечар 18 сьнежня людзі сутыкаюцца з тым, што ў касах няма ані даляраў, ані эўра. Яны выстройваюцца ў чэргі ў чаканьні, што хтосьці захоча памяняць валюту на беларускія рублі.

Аддзяленьні нацыянальнага і камэрцыйных банкаў цяпер поўняцца наведнікамі: людзі традыцыйна робяць аплаты, часам збываюць валюту і ўсё часьцей яе набываюць, шукаючы больш выгаднага курсу беларускага рубля. Размаўляю зь людзьмі:

Карэспандэнтка: «Ці вы спрабуеце набыць валюту?»

Спадарыня: «Так, была ў тым банку, але там чарга вялізная, і тут — таксама».

Супрацоўніца банку, выстаўляючы новыя лічбы на інфармацыйным таблё: «Курсы мяняюцца цягам кожнай паўгадзіны».

Карэспандэнтка: «І на колькі?»

Супрацоўніца: «На тысячы».

Карэспандэнтка: «Гэтак зрэдку бывае ці штодня?»

Супрацоўніца: «Цяпер штодня».

Наведнікі абменьнікаў ня толькі сьпехам набываюць валюту, але спрабуюць высьветліць таксама прычыну хуткага росту курса валюты і падвышанага попыту на яе. Але супрацоўнікі банкаў тлумачэньняў не даюць і пакідаюць права рабіць высновы самім грамадзянам:

Карэспандэнтка: «Што думаеце пра рост курсаў валют адносна рубля?»

Спадар: «З-за таго, што я думаю, ня зьменіцца нічога, бо эканоміка — гэта навука, якую мусяць добра вывучаць эканамісты, і ўрад краіны мусіць мець вопыт і веды».

Карэспандэнтка: «Што мусяць рабіць у гэтай сытуацыі самі людзі, каб не пацярпець?»

Спадар: «Мусяць хадзіць на выбары, выбіраць урад і сачыць за ягонай дзейнасьцю — выбіраць свой урад».

Карэспандэнтка: «Гэта значыць, што ўрад вінаваты ў тым, што адбываецца з курсам рубля?»

Спадар: «Ня толькі — усясьветная эканоміка таксама ўплывае, але ўрад павінен умець адсочваць усе тэндэнцыі. Бо што такое дзяржава? Тая сыстэма, якая бароніць чалавека на пэўнай тэрыторыі».

Карэспандэнтка: «Нас бароніць?»

Спадар: «Не заўсёды».

XS
SM
MD
LG