Лінкі ўнівэрсальнага доступу

Беларусь на «няправільных» мапах сьвету


На расейскіх мапах Беларусь працягваюць называць "Белоруссией". Фота СТВ

На расейскіх мапах Беларусь працягваюць называць "Белоруссией". Фота СТВ

Нягледзячы на шматлікія лічбавыя тэхналёгіі, дагэтуль можна сустрэць памылкі на геаграфічных мапах, як у электронным так і друкаваным фармаце.

Бывае, памылкі выпадковыя — празь нядбайнасьць стваральніка ці памылку машыны. А часам — «няправільныя» мапы ствараюцца мэтанакіравана. На шматлікіх расейскіх мапах і глёбусах дагэтуль сустрэнеш «Белоруссию» замест Беларусі.


Як Беларусь стала Літвой

Па фэйсбуку гуляе мапа Эўразьвязу, на якой няма Беларусі. Першымі яе заўважылі літоўцы. На гэтай мапе Літвой падпісана сучасная Беларусь, а сама Літва разам з Калінінградзкай вобласьцю адышла Расеі. Ананімны карыстальнік сьцьвярджае, што знайшоў гэтую мапу ў амэрыканскім падручніку.

«Опа! Вось вам і падарунак ад амэрыканцаў! Пазбавілі нас выхаду да мора, затое ўзамен павялічылі тэрыторыю! А дзе беларусы?» — камэнтуюць літоўцы ў сацыяльных сетках.

Беларусь на мапе падпісаная Літвой

Беларусь на мапе падпісаная Літвой



Паводле сацыялягічных апытаньняў, Беларусь зь Літвой блытаюць больш за 20% палякаў.

Відавочна, мапа створаная пасьля 2004 году, але крыніцу яе вызначыць не ўдалося.


Як Польшча стала Беларусьсю


У 2012 годзе картографы перанесьлі Польшчу ў Беларусь. Відаць Галяндскія распрацоўнікі не змаглі знайсьці на мапе Польшчу і пераблыталі яе зь Беларусьсю. Прынамсі, на рэклямных плякатах перад эўрапейскім першынствам па футболе менавіта Рэспубліка Беларусь афарбаваная ў колеры польскага сьцяга і пазначаная як суарганізатар Эўра-2012.

Акрамя таго, «з падачы» галяндцаў Беларусь «узбагацілася» такімі гарадамі, як Варшава, Гданьск, Вроцлаў і Познань.



Беларусь як прыбалтыйская краіна


У 2010 годзе часопіс Ecomomist вырашыў пафантазіраваць з мапай Эўропы. «Эўропа як яна павінна выглядаць» — называецца праект.

«Людзі, якія стаміліся ад сваіх суседзяў, могуць пераехаць у іншае месца, у той час жа краіны ня могуць. Але дапусьцім, што могуць. Дык пераробім жа мапу Эўропы, каб зрабіць жыцьцё больш лягічны і добразычлівым», — піша Economist.

«Правільная» мапа Эўропы па вэрсіі часопіса Economist

«Правільная» мапа Эўропы па вэрсіі часопіса Economist


Паводле журналістаў, Беларусь заслужыла выхад да мора і павінна быць бліжэй да скандынаўскіх краінаў, заняць месца цяперашняй Літвы, Латвіі й Эстоніі. А гэтыя тры краіны трэба перанакіраваць у «новае больш адпаведнае месца», дзесьці каля Ірляндыі. «Краіны Балтыі самі хацелі б быць далей ад Расеі і бліжэй да Амэрыкі» — піша Economist.

Стваральнікі мапы прапануюць перасунуць трошкі Калінінград у бок Расеі, каб пакончыць з «анамальнай роляй эксклаву Другой сусьветнай вайны»

На месца Беларусі стваральнікі мапы пасунуць Польшчу і Ўкраіну, такім чынам Бэрлін апынецца ўсяго за 100 кілямэтраў ад Украіны, што паспрыяе яе хутчэйша эўраінтэграцыі.


Замест Расеі — акіян


Далей за ўсіх у перайначваньні мапаў пайшлі грузіны.

Год таму ў грузінскай суполцы ў фэйсбуку зьявілся мапа Ўсходняй Эўропы, на якой няма Расеі. Так-так, яе проста затапіла. На месцы Расеі — вялікі акіян, які стваральнік падпісаў «акіян мараў». Дзякуючы гэтай невялікай маніпуляцыі, Беларусь атрымала выхад да мора, а грузіны — пазбыліся ціску з боку «вялікага брата».



БНР на сучасных мапах


Vanjaz прапануе пафантазіраваць, як выглядала б Усходняя Эўропа, калі б Беларуская Народная Рэспубліка адбылася б як дзяржава. Зьвярніце ўвагу: у складзе Беларусі — Дзьвінск (цяпер — Латвія), Вільня (цяпер — Літва), Беласток (цяпер — Польшча), Кёнігсбэрг (па выніках Другой сусьветнай вайны Беларусь як адна з найбольш пацярпелых ад гітлераўскай Германіі дзяржаваў магла атрымаць гэтую вобласьць, паводле аўтара мапы), а таксама — Бранск і Смаленск (цяпер — Расея).

XS
SM
MD
LG