Лінкі ўнівэрсальнага доступу

«Птушыны кароль» Баскін адпушчаны зь СІЗА КДБ пад хатні арышт


Яўген Баскін

Яўген Баскін

Кіраўнік СЗАТ «Сэрвалюкс» Яўген Баскін, затрыманы КДБ 15 сакавіка, сёньня пераведзены пад хатні арышт. Пра гэта БелаПАН паведаміў начальнік прэс-службы Камітэту дзяржбясьпекі Беларусі Дзьмітры Пабяржын.

Паводле яго, такое рашэньне было прынята «ў сувязі з наноў адкрытымі акалічнасьцямі».

Партал TUT.BY, са спасылкай на ўласныя крыніцы, піша, што Баскін кампэнсаваў суму шкоды, якая яму інкрымінавалася, — 370 млрд беларускіх рублёў.

Агулам па справе акцыянэрнага таварыства «Сэрвалюкс» разам з Баскіным былі затрыманыя 15 чалавек. Лёс іншых затрыманых пакуль невядомы.

Разам з тым працягваюцца крымінальныя справы супраць канкурэнтаў Баскіна — «Біякаму» Андрэя Паўлоўскага і «Консула» Віктара Раўкова і братоў Гільманаў, а таксама супраць дырэктаркі Віцебскай бройлернай фабрыкі Ганны Шарэйкі.

Таксама нядаўна быў затрыманы, як паведамляюць СМІ, сябра Баскіна Юры Чыж. Баскін, у прыватнасьці, быў на вясельлі сына Чыжа.

Баскін значыўся пад нумарам 6 у топе беларускіх пасьпяховых і ўплывовых бізнэсоўцаў за 2016 год «Ежедневника». Чыж жа ў тым топе займаў толькі 12 месца, хоць у 2013-м меў першае.

«Сэрвалюкс» Баскіна — гэта гандлёвыя маркі мяса птушкі «Пятруха», «Браты Грыль» і «Курасельскія», малочных прадуктаў «Кубышка» і сыроў Landers, лінейка кармоў «ЛактЭКА», сетка з 40 крамаў «Квартал смаку», фабрыка інкубацыйных яек і куранятаў, дзьве фабрыкі па вырошчваньні і перапрацоўцы мяса птушкі, два заводы камбікармоў, адзін мясакамбінат і адзін малаказавод. Кампанія трымае 30% рынку мяса птушкі ў Беларусі, яе бізнэс у апошнія гады рос.

Паказаць камэнтары

XS
SM
MD
LG