Украінская місія заявіла, што праект заявы быў заблякаваны Расеяй, перадае РБК. «Расея заблякавала распаўсюджаную Ўкраінай заяву Рады Бясьпекі ААН для прэсы па Крыме. Нікчэмная спроба адмаўляць відавочнае», — гаворыцца ў паведамленьні ўкраінскай місіі.
Пра тое, што Ўкраіне не ўдалося дамагчыся ад Рады Бясьпекі ААН прыняцьця заявы па Крыме, таксама паведамляе ТАСС са спасылкай на дыпляматычную крыніцу ў штаб-кватэры арганізацыі.
«Праект заявы быў унесены на разгляд, але празь некалькіх гадзінаў узгадніць яго не атрымалася», — сказаў суразмоўца агенцтва.
Украіна распаўсюдзіла сярод сябраў Рады Бясьпекі праект заявы для прэсы ў адказ на ўключэньне Крыму і Сэвастопаля ў склад Паўднёвай фэдэральнай акругі Расеі.
Сталы прадстаўнік Украіны пры ААН Уладзімер Ельчанка адзначаў, што ня будзе зьдзіўлены, калі дакумэнт будзе заблякаваны Расеяй, якая зьяўляецца сталым сябрам Рады бясьпекі ААН і валодае правам вэта. Ельчанка абмеркаваў заяву з генэральным сакратаром арганізацыі Пан Гі Мунам.
Раней свой пратэст у сувязі з уключэньнем Крыму ў Паўднёвую Фэдэральную акругу выказала МЗС Украіны. Ведамства адзначала, што рашэньне прэзыдэнта Расеі Ўладзімера Пуціна «зьяўляецца нікчэмным і не стварае ніякіх прававых наступстваў для статусу Аўтаномнай Рэспублікі Крым і горада Сэвастопаля і міжнародна прызнаных межаў Украіны».
