9 сакавіка на нарадзе аб актуальных пытаньнях разьвіцьця Беларусі Аляксандар Лукашэнка жорстка раскрытыкаваў выканаўцаў дэкрэту № 3, адзначыўшы дрэннае выкананьне з боку чыноўнікаў рознага ўзроўню, ужыўшы нават слова «сабатаж». Ён канстатаваў, што «арганізацыю выкананьня дэкрэту проста пераклалі на падатковую службу».
Дакумэнт адмяняць ня будуць, аднак падкарэктуюць, а таксама больш прынцыпова і дакладна падыдуць да фармаваньня сьпісу платнікаў збору, заявіў Аляксандар Лукашэнка.
Прэсавы сакратар Міністэрства падаткаў і збораў Сяргей Шкут на пытаньне Свабоды, якія прапановы ўнясе ведамства, пра ўдакладненьне дэкрэту адказаў:
«Карэктаваньнем заканадаўства будзе займацца Міністэрства працы і сацыяльнай абароны. Па ўсіх пытаньнях, што тычыцца дэкрэту № 3 „Аб папярэджаньні сацыяльнага ўтрыманства“, зьвяртайцеся ў Міністэрства працы і сацыяльнай абароны. Мэтадалёгія за імі»
На пытаньне Свабоды, якім чынам будуць удакладняцца і вывярацца сьпісы грамадзянаў, што павінны будуць уносіць плацяжы на падставе дэкрэту № 3, хто іх будзе складаць (мясцовыя органы ўлады ці падаткавікі), Сяргей Шкут адказаў той жа самай фразай: «Паправак яшчэ няма. Вы чулі, што сказаў прэзыдэнт? Карэктаваньнем займаецца Міністэрства працы і сацыяльнай абароны».
З прэсавай службай Мінпрацы Свабодзе пакуль зьвязацца не ўдалося.
Тым часам прэсавы сакратар прэм’ер-міністра Рэспублікі Беларусь Уладзіслаў Сычэвіч паведаміў Свабодзе:
«Удакладненьнем дэкрэту № 3 будзе займацца ўрад і адпаведныя міністэрствы. Цяпер выпрацоўваецца мэханізм узаемадзеяньня міністэрстваў і ведамстваў, мясцовых органаў улады, вызначаюцца тэрміны. Больш падрабязна мы будзем гатовыя адказаць на ўсе пытаньні ў панядзелак, 13 сакавіка».
