Лінкі ўнівэрсальнага доступу

За год экспарт упаў на 18,6%, імпарт — на 14,4%


Згодна са справаздачай Белстату пра асноўныя сацыяльна-эканамічныя паказьнікі Беларусі ў студзені-жніўні 2016 году, замежны гандаль значна ўпаў у параўнаньні зь мінулым годам.

Падзеньне аб’ёмаў замежнага гандлю (і экспарту, і імпарту) працягваецца з 2013 году.

Згодна са справаздачай, у студзені-ліпені 2016-га аб’ёмы экспарту тавараў зь Беларусі склалі ў актуальных цэнах 81,4% ад такіх у 2015 годзе (тады было 16,1 млрд даляраў). Экспарт сельскагаспадарчай прадукцыі за гэты пэрыяд упаў на 13,1%, а экспарт паслугаў — на 6,1%. Імпарт за той жа пэрыяд склаў 85,6% ад студзеня-ліпеня летась (было 17,6 млрд даляраў).

Найбольш упаў экспарт у краіны па-за межамі СНД, на 33%. Імпарт зь іх упаў на 14,3%. Тры пятыя таваразвароту па-за межамі СНД — з Эўразьвязам. Экспарт у Расею ўпаў меней, на 6,4%, а імпарт з Расеі — на 13,1%.

Сальда замежнага гандлю засталося адмоўным — Белстат яшчэ не фіксаваў такога году, калі б яно было станоўчым, хоць найбліжэй да таго Беларусь была ў 2012 годзе.

Што цікава, рост імпарту назіраецца толькі ў Гарадзенскай вобласьці (+11,2%), якая мяжуе зь Літвой і Польшчай. Але яе доля што ў экспарце, што ў імпарце малая: 6,7% экспарту і 4,5% імпарту ад усёй Беларусі. Асноўную масу экспарту і імпарту тавараў дае Менск (37,3% экспарту і 36,9% імпарту) і Менская вобласьць (адпаведна 20,8% і 15,3%).

У нацыянальных маштабах у справаздачы практычна кожны паказьнік адмоўны: ВУП упаў, заработная плата ўпала, прадукцыйнасьць працы, прамысловая і сельскагаспадарчая вытворчасьць таксама, інвэстыцыі ў асноўны капітал упалі, тое ж і з будаўніцтвам.

Праўда, разам з гэтым крыху зьнізілася і колькасьць афіцыйна зарэгістраваных беспрацоўных: 42646 чалавек на канец жніўня 2016 году, на 686 меней за канец мінулага году. Афіцыйнае беспрацоўе ў Беларусі ўсё яшчэ ніжэйшае за 1% ад эканамічна актыўнага насельніцтва.

Вырасла толькі вонкавая пазыка: на 1 жніўня — 13,3 млрд даляраў (+9,3% ад пачатку году).

Адсутнасьць эканамічнага росту насьцярожыла нават Лукашэнку, які яшчэ нядаўна забараняў даваць эканоміцы «занадта пэсымістычныя ацэнкі».

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG