Кандыдатура была безальтэрнатыўная. «За» прагаласавалі ўсе ўдзельнікі сходу, акрамя аднаго, які ўстрымаўся.
Журналісты запыталі, чаму выбары новага кіраўніка «Гавары праўду» былі безальтэрнатыўныя, тым больш што раней згадвалася, што, магчыма, вылучацца ў якасьці старшыні грамадзянскай кампаніі будзе і Тацяна Караткевіч. Андрэй Дзьмітрыеў адказаў на гэтае пытаньне так:
«Мы абмяркоўвалі кандыдатуру Тацяны Караткевіч, але Тацяна Караткевіч — кандыдат у прэзыдэнты не ад кампаніі „Гавары праўду“, а ад „Народнага рэфэрэндуму“. І мы палічылі, што яна, па магчымасьці, павінна быць больш-менш роўнааддаленая ад усіх структураў, якія ўваходзяць у „Народны рэфэрэндум“. Мы палічылі, што нам трэба і надалей падтрымліваць нашы партнэрскія сувязі».
На пачатку сходу перад яго ўдзельнікамі выступіў першы кіраўнік «Гавары праўду» Ўладзімер Някляеў. Карэспандэнт Свабоды запытаўся ў яго: ці хто цікавіўся ягонай думкай пра новага старшыню кампаніі?
«У кулюарах пытаньне задавалася. Але я не палічыў патрэбным навязваць сваю волю. Ім жыць далей з тым чалавекам, якога яны абяруць. І няхай яны самі адказваюць і за тое, як ім жыць, і за таго чалавека, зь якім ім жыць. Я лічу, гэта правільны падыход».
