Лінкі ўнівэрсальнага доступу

Адно слова — і ў карцэр. Як у Магілёўскай турме прэсуюць Андрэя Бандарэнку


Андрэй Бандарэнка на судзе, 2014 год

Андрэй Бандарэнка на судзе, 2014 год

Пяць сутак карцэру за адно слова атрымаў вязень Магілёўскай турмы, заснавальнік праваабарончай арганізацыі «Плятформа» Андрэй Бандарэнка. Інцыдэнт адбыўся ў пачатку чэрвеня, паведаміў Свабодзе бацька праваабаронцы Валер Бандарэнка.

«Сыну забаранілі размаўляць зь іншымі вязьнямі, у тым ліку падчас прагулкі ў турэмным дворыку, — распавядае ён. — Калі вялі на прагулку, дык нехта з тэрыторыі сьледчага ізалятару запытаў у яго, зь якой ён камэры. Андрэй назваў нумар. Аказалася, пытаньне задаваў падсьледны і Андрэй ня меў права на яго адказваць. Атрымаў за адно слова 5 сутак карцэру.

Хаця ён і гэтак сядзіць фактычна ў карцэры — у адзіночцы, ні з кім не кантактуе, дык яшчэ і слова не скажы ў калідоры. Я езьдзіў скардзіцца да кіраўніцтва турмы, але на мае скаргі не зьвяртаюць увагі, хаця трымаюць сына ў самых невыносных умовах».

Валер Бандарэнка

Валер Бандарэнка

У Магілёўскую турму праваабаронца Андрэй Бандарэнка патрапіў са Шклоўскай калёніі ў 2015 годзе як злосны парушальнік рэжыму. Тут умовы ўтрыманьня вязьня станавіліся ўсё больш жорсткімі.

Нядаўна ў адзіночнай камэры, дзе знаходзіцца Андрэй Бандарэнка, усталявалі відэаназіраньне і цяпер кожны рух вязьня кантралююць. У тым ліку яму забаронена ў дзень класьціся на турэмны ложак.

У 2014 годзе Андрэй Бандарэнка быў асуджаны на 3 гады за злоснае хуліганства. У судзе праваабаронца прызнаў віну часткова, заявіўшы, што большасьць ягонай справы сфабрыкаваная міліцыяй.

Партрэт Андрэя Бандарэнкі ў пакоі бацькі

Партрэт Андрэя Бандарэнкі ў пакоі бацькі

Бандарэнка не выключаў, што яму помсьцяць за выкрыцьцё зьдзекаў з боку міліцыі над вязьнямі беларускіх калёній і ўстаноў утрыманьня.
Меркаваньні праваабаронцаў адносна законнасьці асуджэньня Андрэя Бандарэнкі падзяліліся.

У месцах выкананьня пакараньня Андрэй Бандарэнка сустрэў самае жорсткае стаўленьне, жорсткія ўмовы і правакацыі.

XS
SM
MD
LG