Лінкі ўнівэрсальнага доступу

Марына Адамовіч: Мікалай ніколі ня зьбег бы. Ён не паехаў у Парыж!!!


Марына Адамовіч і Мікола Статкевіч
Марына Адамовіч і Мікола Статкевіч

Жонка лідэра Беларускага Нацыянальнага Кангрэсу Марына Адамовіч зьвярнулася праз сваю старонку ў Фэйсбуку з заявай з нагоды ягонага зьнікненьня.

«Я абсалютна афіцыйна заяўляю: Мікалай ніколі, ні пры якіх абставінах ня зьбег бы, не схаваўся, не пакінуў бы людзей, якіх запрасіў на акцыю, за якую ўзяў адказнасьць на сябе! НІКОЛІ! Ён паўзком бы прыпоўз, калі б меў такую магчымасьць. Тыя, хто яго ведае, пацьвердзяць...

Ён не паехаў у Парыж!!!

Уся адказнасьць за яго лёс і лёсы іншых, абвінавачаных у злачынствах, якіх яны не ажыцьцяўлялі, ляжыць на тых, хто на працягу апошняга месяца распаўсюджваў, у тым ліку празь дзяржаўныя СМІ, паклёпніцкую інфармацыю, фабрыкаваў крымінальныя справы супраць дэмакратычных актывістаў, выцягваў зь небыцьця „арматуру“ і „кактэйлі Молатава“, жорстка зьбіваў грамадзянаў сваёй краіны, найперш на асобе, якая у эфіры дзяржаўнага тэлебачаньня пагражала новым турэмным зьняволеньнем Мікалаю, не называючы, праўда, прозьвішча. Я патрабую адказу! Я хачу бачыць Мікалая», — заяўляе Марына Адамовіч.

Трэці дзень сваякі і паплечнікі Міколы Статкевіча нічога ня ведаюць пра месца ягонага знаходжаньня. Марына Адамовіч, жонка палітыка, спрабавала высьветліць гэта ў міліцыі і КДБ, але марна. 27 сакавіка яна зьбіраецца падаваць заяву аб зьнікненьні чалавека.

Сёньня прадстаўнік Камітэту дзяржаўнай бясьпекі Дзьмітры Пабяржын сказаў Свабодзе, што ведамства ня мае ніякіх зьвестак пра тое, дзе цяпер можа быць Статкевіч.

Напярэдадні тэлеканал СТБ паказаў сюжэт, у якім супрацоўнікі КДБ атрымалі апэратыўную інфармацыю аб правакацыі, якая нібыта рыхтавалася ў Менску падчас акцыі на Дзень Волі.

«Пад апэратыўнае назіраньне трапіў прыпаркаваны 23 сакавіка на стаянцы ў раёне Акадэміі навук легкавы аўтамабіль. Ужо ўстаноўлены чалавек, які прыгнаў машыну на гэтае месца. Гэта 32-гадовы жыхар Менску Сяргей Кунцэвіч», — перадае СТБ.

У аўтамабілі як быццам знойдзеныя «гукаўзмацняльная апаратура, правады, мікрафон і кардонныя каробкі зь дзясяткамі бутэлек, напоўненых вадкасьцю з пахам гаручай сумесі і з кнотам з анучаў. Як высьветлена, Кунцэвіч — прыхільнік Беларускага нацыянальнага кангрэсу, ініцыятарам якога ёсьць Статкевіч».

Марына Адамовіч удакладніла, што Сяргей Кунцэвіч — сябра аргкамітэту БСДП НГ (Беларускай сацыял-дэмакратычнай партыі «Народная грамада»), але ніколі ня быў кіроўцам Статкевіча.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG