Лінкі ўнівэрсальнага доступу

«Накінуў на шыю скульптуры пятлю і нанёс два ўдары рукой па яе галаве», — абвінавачаньне Вячаслава Касінерава


Вячаслаў Касінераў

Чакаецца, што 11 красавіка стане вядомая дата суду над актывістам анархісцкага руху Вячаславам Касінеравым.

Пра гэта карэспандэнту Свабоды паведаміла сяброўка Вячаслава Марына Насенка. «Адвакат заўтра пойдзе да Вячаслава і да судзьдзі. Заўтра ўжо будзе вядомая дата суду».

У афіцыйным абвінавачаньні актывіста анархісцкага руху Вячаслава Касінерава гаворыцца, што ён «груба парушыў грамадзкі парадак» і «дзейнічаў з выключным цынізмам».

Паводле абвінавачаньня, Касінераў учыніў хуліганскія дзеяньні: «накінуў на шыю скульптуры „Менскага гарадавога“ пятлю (якая імітуе пятлю для павешаньня), выкананую з канату сьветлага колеру, які выдзяляецца на фоне скульптуры і прыкметны для навакольных, пасьля чаго зацягнуў пятлю каля шыі скульптуры і, у працяг сваіх дзеяньняў, нанёс два ўдары рукой па галаве скульптуры „Менскага гарадавога“, якая ўвасабляе парадак і спакой на вуліцах гораду».

У лістах да сяброўкі Марыны Насенкі Вячаслаў Касінераў выказвае спадзяваньне, што «хутка ўсё гэтае цемрашальства скончыцца».

«Вельмі бадзёраць твае словы пра тое, што людзі памятаюць і падтрымліваюць мяне. На жаль, я не адзін такі, спадзяюся, хутка ўсё гэтае цемрашальства скончыцца. Полымя свабоды палае ў нашых грудзях нават тут», — піша Касінераў.

«Па апошніх лістах мне падалося, што ты троху разгубілася і перажываеш. Ня трэба. Усё добра. Няма ніякай „слабасьці“ ці чагосьці такога. Я цьвёрда веру ў нашы ідэалы, я ўпэўнены ў табе. Усё астатняе — другасна. Вырашальна», — піша Касінераў яшчэ ў адным лісьце да Марыны Насенкі.

Фігуранты справы «Белага легіёну»

Што такое «Белы легіён»

Ваша меркаваньне

Паказаць камэнтары

XS
SM
MD
LG