Лінкі ўнівэрсальнага доступу

Начная аБЛОГА 13 лютага


Агляд беларускага сеціва.


На форумах парталу TUT.by абмяркоўваюць артыкул электроннага выданьня “Ежедневник» пад назвай “Лукашэнка апошнім часам скінуў 13 кіляграмаў”. Артыкул прысьвечаны ўчорашняй сустрэчы кіраўніка краіны са студэнтамі БДУ. Менавіта ў часе гэтай сустрэчы Аляксандар Лукашэнка крыху расказаў пра сваё асабістае жыцьцё: ня мае ўласнага псыхоляга, у маладосьці днём і ўначы чытаў кніжкі, сам, без дыетоляга схуднеў на 13 кіляграмаў, хоць любіць салодкае.

Камэнтары ўдзельнікаў форумаў:

“Пагутарыў пра ўсё, нават пра салодкае... А наконт адмены льготаў і кампэнсацыі гэтай адмены канкрэтна для студэнтаў неяк забыліся. Цікава, чаму забыліся?”

“Тым студэнтам, што задавалі пытаньні, льготы нецікавыя”.

“Нешта я не заўважыла, каб ён схуднеў на 13 кіляграмаў. Ці гэта тэлевізія кожны раз візуальна павялічвае? А калі і схуднеў настолькі, гэта ўвогуле трывожны знак. Бо ён ніколі ня быў тоўстым і займаўся спортам”.

“На 13 кіляў схуднеў без дыетоляга? Альбо са здароўем праблемы, альбо яму трэба кансультаваць барацьбітоў і баксёраў... Але, выглядае на тое, што наконт таго, як правільна схуднець, ён кансультуе толькі народ (чарка, хлеба крыху)”.

Чытачы сайту “Нашай нівы” абмяркоўваюць кадравую ракіроўку мінулага тыдня: Пётар Міклашэвіч узначаліў Канстытуцыйны суд, а Рыгор Васілевіч стаў генэральным пракурорам.

«Цікава, а цяпер Васілевіч будзе распавядаць пра прасоўваньне расьследваньня ў справе Захаранкі?”

“Памянялі Пецю на Рыгора –
Значыць, заўтра будзе як учора».

«Усё як у Вялікага Ўсходняга Брата: там мянялі пракукора на міністра, а мы чым горш?»

Блогер Wal_de_maar зьвярнуў увагу на паведамленьне на сайце прадпрыемства “Менсктранс” Адзін з наведнікаў абураецца з нагоды таго, што ў Менскім транспарце стала зашмат беларускай мовы і, на ягоную думку, гэта дзіўна для “расейскамоўнага гораду”.

На сайце moladz.org напярэдадні дня Сьвятога Валянціна зьявілася ТОП-10 самых рамантычных месцаў Менску. У сьпіс мясьцінаў, дзе можна гуляць, размаўляць пра паэзію і прызнавацца ў каханьні, трапілі вуліца Камуністычная, Траецкае прадмесьце, Лошыцкі парк, дахі 12-павярховых дамоў у раёне «Белай Вежы», а таксама... Кальварыйскія могілкі – для неардынарных асобаў.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG