Лінкі ўнівэрсальнага доступу

Суд над Уладзімерам Кацорам доўжыўся тры хвіліны


Старшыня Савецкага раённага суду Гомеля Аляксандар Кострыкаў пакараў арыштам на сем сутак рэгіянальнага каардынатара руху “За свабоду”, сябра АГП Уладзімера Кацору.


Ён абвінавачаны ў парушэньні парадку арганізацыі й правядзеньня масавага мерапрыемства.

Раніцай Уладзімера Кацору выклікаў у Савецкі райаддзел міліцыі начальнік аддзяленьня аховы правапарадку міліцыі маёр Сяргей Яруціч. А пасьля маёр Яруціч, узяўшы з сабой Кацору, паехаў рабіць ператрус у офісе АГП на вуліцы Палескай, 52.

Зьвязана гэта з тым, што ў дамах па вуліцы Барыкіна — 94 і 98 — былі распаўсюджаны ўлёткі пра сустрэчу з Аляксандрам Мілінкевічам, якая мае адбыцца 15 лютага непасрэдна ў двары згаданых дамоў, а таксама ў скверы Янкі Купалы на Рэчыцкай шашы. Экс-кандыдат у прэзыдэнты мае выкласьці гараджанам праграму пераадоленьня сацыяльна-эканамічных праблем, выкліканых, як сказана ва ўлётках, “недальнабачнай палітыкай цяперашняга кіраўніцтва”. І адказаць на мажлівыя пытаньні гамельчукоў.

Паведамлялася таксама, што гарвыканкам не дазволіў праводзіць сустрэчу зь Мілінкевічам у ДК “Фэстывальны”. Быў пададзены тэлефон Уладзімера Кацоры.

За ўлёткі і склалі на палітыка адміністрацыйны пратакол пра парушэньне парадку арганізацыі й правядзеньня масавага мерапрыемства.

Суд цягнуўся літаральна тры хвіліны.

“Поўнае беззаконьне. У гэтым відаць уся “лібэралізацыя” рэжыму. На словах – адно, на справе – іншае”, — лічыць Уладзімер Кацора.

Адбываць пакараньне Ўладзімера Кацору адправілі ў ізалятар часовага ўтрыманьня на вуліцы Барысенкі.

За два апошнія гады гэта ўжо пятае пакараньне актывіста арыштам за палітычную й грамадзкую дзейнасьць.

Агулам Уладзімер Кацора правёў ужо ў няволі 34 сутак — без уліку сёньняшняга арышту.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG