Лінкі ўнівэрсальнага доступу

Пінск: міліцыя хоча зрабіць ператрус у кватэры А.Васільева


Аляксандар Васільеў
Аляксандар Васільеў

Сёньня судзьдзя Пінскага гарадзкога суду Зьміцер Лешчанка прыняў рашэньне перанесьці разгляд адміністрацыйнай справы лідэра мясцовых прадпрымальнікаў Аляксандра Васільева на 15 лютага. Тым часам міліцыя спрабуе правесьці у кватэры А.Васільева ператрус.


Аляксандар Васільеў быў затрыманы ўчора на калгасным рынку ў Пінску. Паводле словаў Аляксандра, маёр Сыраежка абвінаваціў яго ў тым, што ён нібыта арганізаваў акцыю пратэсту прадпрымальнікаў:

“Мяне завялі ў камэру, дзе я адседзеў амаль два дні. Цяпер вось завялі на суд, які мяне адпусьціў, але вось цяпер стаіць ля мяне міліцыянт і заяўляе, што хоча зрабіць ператрус у маёй кватэры. Я патрабую высьветліць, ці ёсьць у яго санкцыя пракурора. Вы, калі ласка, пазьней патэлефануйце”.

Сёлета Аляксандра Васільева ўжо судзілі. Гэта было 1 лютага. Тады судзьдзя Пінскага гарадзкога суду Тацяна Сьвібовіч разглядала два міліцэйскія пратаколы. Адзін удалося аспрэчыць. Спадар Васільеў нават без адваката пераканаў суд у супярэчлівасьці сьведчаньняў міліцыянтаў і ня быў арыштаваны, як таго патрабаваў міліцэйскі пратакол.

Праваабаронца Валеры Шчукін лічыць, што тая перамога Васільева ў судзе стала прычынай яго затрыманьня ўчора:

“Гэта адзіная прычына. Іншай прычыны і быць ня можа. За гэта яго зноў схапілі. Я яму ўжо казаў, што нельга хадзіць на акцыі аднаму. Да прыкладу, я ніколі адзін на акцыі не хаджу. Вядома, сьведка з майго боку – не гарант бясьпекі, але тым ня менш. Нельга хадзіць аднаму. Нельга!”

На пачатку сёньняшняга судовага паседжаньня Аляксандр Васільеў заявіў, што яго хвалюе лёс маці. Сёньня 65-гадовую жанчыну забрала ў лякарню “хуткая дапамога”.

Аляксандру Васільеву 35 гадоў. Ён – сябра кампаніі “За свабоднае разьвіцьцё прадпрымальніцтва”. За арганізацыю акцыяў пратэсту і ўдзел у іх арыштоўваўся раней на 5, 7 і 15 сутак.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG