Лінкі ўнівэрсальнага доступу

Сёньня ў цэнтры Баранавічаў адбылася несанкцыянаваная акцыя пратэсту прадпрымальнікаў супраць прэзыдэнцкага ўказу № 760.


Паводле актывіста прадпрымальніцкага руху Мікалая Чарнавуса, на акцыю прыйшлі больш за дзьвесьце прадпрымальнікаў і найманых асобаў. Яны патрабавалі адмены прэзыдэнцкага ўказу № 760. Удзельнікі акцыі скандавалі: “Работу!” У інтэрвію “Свабодзе” яны патлумачылі, што вымусіла іх прыйсьці на мітынг:

Спадарыня: “Мы сабраліся, каб нам далі свабодна працаваць. Каб нам не перашкаджалі”.

Спадарыня: “Бо нам есьці хочацца. У нас забіраюць усё – і ўладу, і працу. Я інвалід другой групы. Мне не даюць працаваць, зьнялі ўсе льготы. А што мне есьці?”

Прадпрымальнік: “Створаны такія ўмовы, што праз год мы ўсе вымушаныя будзем застацца бяз працы. Мы з жонкай вымушаныя будзем існаваць на капейкі. У мяне ў траўні звольненыя тры чалавекі, якія дагэтуль бяз працы”.
Праз год заснемся бяз працы...

Спадарыня: “Урад нас сам штурхае на тое, каб мы парушалі законы, наша заканадаўства, якое фармуецца супраць нас, невядома ў чыіх інтарэсах. Я была прадпрымальнікам, у мяне працавалі двое найманых. Адна зь іх — маці-адзіночка, сама сірата. Ёй няма каму дапамагчы, і як ёй карміць дзіця?”

На пачатку акцыі былі затрыманыя два маладафронтаўцы: Яраслаў Грышчэня і непаўналетні Вадзім Бегені. Іх адвезьлі ў міліцыю, але потым адпусьцілі, калі ўдзельнікі акцыі вырашылі пайсьці да будынку міліцыі, каб запатрабаваць вызваленьня затрыманых. Аднак міліцыянты склалі на хлопцаў пратаколы.

“Яны заявілі, што мы з Вадзімам лаяліся матам, калі стаялі каля помніка Грыцаўцу, – расказаў Яраслаў Грышчэня. – Прывезьлі ў РУУС, склалі пратакол, перагледзелі ўсе асабістыя рэчы, там быў мэгафон, сьцяг. Яны ўсё гэта аддалі, пасадзілі ў машыну і прывезьлі мяне дадому. Сказалі, калі мяне ўбачаць на плошчы Леніна падчас мітынгу, дадуць сем сутак”.

“Там напісалі, што мы выкрыквалі антыдзяржаўныя лёзунгі ў мэгафон і лаяліся матам, – дадае Вадзім Бегені. – Гэтага зусім не было. Мы проста стаялі, размаўлялі, падышлі чатыры міліцыянты, скруцілі нас. Пасадзілі ў машыну і павезьлі”.

Да ўдзельнікаў мітынгу выйшла кіраўніца ўпраўленьня эканомікі гарвыканкаму Раіса Ўласовіч. Яна прапанавала прадпрымальнікам прыйсьці ў сераду на сустрэчу ў будынак гарсавету. У размове з карэспандэнтам “Свабоды” яна сказала:

“Я іх папрасіла напісаць, чаго яны хочуць, якія праблемы яны хочуць вырашыць. Калі адмяніць указ прэзыдэнта, то мы гэта не вырашаем”.

Паказаць камэнтары

XS
SM
MD
LG