Лінкі ўнівэрсальнага доступу

“Бяскроўная рана” для воінаў-аўганцаў


Агляд беларускага незалежнага друку.


Газэта “Вечерний Брест” распавядае пра сытуацыю зь “невыязнымі” грамадзянамі на памежжы. Сёлета цягам студзеня на пунктах пропуску Берасьцейскай памежнай групы не выпусьцілі 180 чалавек. Пэўная колькасьць, мяркуе газэта, патрапіла ў сьпісы выпадкова, па памылцы, – і распавядае пра тых, хто на ўласным прыкладзе сутыкнуўся з неспадзяванкай на мяжы: у сьпісах невыязных людзі былі, а структуры, адказныя за гэтыя сьпісы, сьведчаць, што прэтэнзій да іх няма. Больш за 15 тысяч жыхароў Берасьцейскай вобласьці было ў афіцыйных сьпісах невыязных на момант 5 лютага.

Артыкул Тацяны Шаламавай “Бяскроўная рана” прысьвечаны наступствам адмены ільгот. У прыватнасьці, сытуацыі з ільготамі воінаў-афганцаў. Для іх, высьветлілася неўзабаве пасьля 17 сьнежня, калі ў моц увайшла пастанова пра адмену льгот, праезд у грамадзкім транспарце застаўся напалову меншым. І гэта – адзіная з ільготаў для воінаў-інтэрнацыяналістаў, якая засталася правамоцнай. Афганцы лічаць пазбаўленьне льготаў маральнай аплявухай для сябе.

Пільную ўвагу “Белгазеты”прыцягнулі доўгачаканыя вызваленьні палітзьняволеных – Артура Фінькевіча, Зьміцера Дашкевіча. Газэта прагназуе – што будзе, калі бліжэй да вясны вызваляць і Аляксандра Казуліна? Віктар Марціновіч, намесьнік рэдактара газэты, разважае:

“Ходзяць чуткі, што Казуліна вызваляць да канца лютага, і напярэдадні традыцыйна гарачага часу надыходзячай вясны гэта было б цікавай падзеяй, асабліва на тле даволі гарачай сытуацыі – у прыватнасьці, меркаванай на 17 лютага акцыі прадпрымальнікаў. Аднак робяцца высновы, што Казулін – асоба ня вельмі прыемная як для улады, гэтак і для сыстэмнай апазыцыі”.

Таксама “Белгазета” зрабіла спробу падтрымаць беларускі выдавецкі рух: журналісты газэты падрыхтавалі сюжэты ў розных кірунках: беларускага фэнтэзі, беларускай меладрамы, беларускага дэтэктыву ды эзатэрычнага раману.

Газэта “Белорусы и рынок” у артыкуле Аляксандра Алесіна “Асімэтрыя адказу” дасьледуе сыстэму ўзбраеньня Беларусі. Разьмяшчэньне дадатковай расейскай зброі ў Беларусі, піша выданьне, – можа перашкодзіць кампрамісу між Расеяй і ЗША адносна пазыцыяў амэрыканскай супрацьракетнай абароны на тэрыторыі Польшчы і Чэхіі.

Артыкул “Плян па Марксу: людзі мінус капітал” распавядае пра акалічнасьці пляну перабудовы вуліц Маркса і Камсамольскай. Жыхароўгэтых вуліц мяркуюць выселіць з менскага цэнтру ў аддаленыя раёны, а вуліцу Маркса зрабіць пешай. На месцы жылых дамоў плянуюць разьмясьціць казіно, гандлёвы цэнтар ды паркінг. Хто ініцыятар праекту, хто прымаў рашэньні – дасьледавала Марына Бяляцкая. Канфлікт на вул. К.Маркса яскрава выявіў недасканаласьць беларускага заканадаўства ў сфэры абароны правоў маёмасьці, – сьведчаць юрысты.

Паказаць камэнтары

XS
SM
MD
LG