Лінкі ўнівэрсальнага доступу

Гомель: суд не адмяніў пакараньне актывісту


Алег Шабетнік перад будынкам суду

Алег Шабетнік перад будынкам суду

Сёньня судзьдзя Гомельскага абласнога суду Дзьмітры Улога адхіліў скаргу рэчыцкага актывіста руху “За свабоднае разьвіцьцё прадпрымальніцтва”, кіраўніка рэгіянальнай арганізацыі Беларускай сацыял-дэмакратычнай партыі Алега Шабетніка на пакараньне пяцьцю суткамі арышту й штрафам у памеры 700 тысячаў рублёў.


Актывіст і адзін з заяўнікаў мітынгу прадпрымальнікаў у Менску быў затрыманы 9 студзеня позна ўвечары па дарозе дадому. Раніцай ён меўся ехаць у сталіцу на акцыю пратэсту.

Участковы інспэктар Рэчыцкага райаддзелу міліцыі Дзяніс Ніканенка абвінаваціў спадара Шабетніка ў брыдкаслоўі й непадпарадкаваньні міліцыі.

Абласны суд адхіліў усе аргумэнты Алега Шабетніка – і што брыдкасловіць ён ня мог фізычна, бо, калі да яго падышоў участковы міліцыянт, ён размаўляў па мабільным тэлефоне зь менскім знаёмым, і што ніякіх сьведкаў на пустой вуліцы не было. Гаворыць Алег Шабетнік:

“Будзем усё роўна змагацца, бо працаваць так немагчыма. Сёньня мне патэлефанавалі з Рэчыцы й сказалі, што зь першага сакавіка забароняць нам абуткам гандляваць У суседнім Сьветлагорску ўжо забаранілі гандляваць на рынку касмэтыкай. Людзей выжываюць і не даюць працаваць. А што нас штрафуюць і саджаюць, мусіць, такі наш лёс. Будзем і надалей працаваць і змагацца, не адступім ні на паўкроку. За намі нашы сем’і, дзеці – іх трэба карміць, апранаць, вучыць”.

Нагадаем, што напярэдадні прэзыдэнцкіх выбараў Алега Шабетніка трымалі за кратамі амаль трое сутак і пакаралі буйным штрафам.


XS
SM
MD
LG