Мэдыкі спасылаюцца на тое, што выконваюць інструкцыю. Старшыня арганізацыі прадпрымальнікаў “Пэрспэктыва” Анатоль Шумчанка лічыць гэта сьведчаньнем дыскрымінацыі ў дачыненьні да бізнэсоўцаў.
Прадпрымальніца Алена Трушчанка паведаміла “Свабодзе”, што была са сваім сынам у дзіцячай паліклініцы № 19 на прыёме ў лекаркі. Тая ёй паведаміла, што бальнічны ліст па дагляду за дзіцём можа даць толькі пасьля таго, як ёй пакажуць даведку пра выплату падаткаў.
Алена паведаміла, што разгубілася і ня ведала, што адказаць:
Гаворыць Алена Трушчанка:
“Настолькі была зьбянтэжаная, што спытала ці толькі ў адносінах да мяне такія меры, ці да ўсіх прадпрымальнікаў. Мне адказалі, што гэта да ўсіх прадпрымальнікаў. Прадпрымальнікаў ужо нават у паліклініках сталі “заціскаць”. Гэты бальнічны на выплаты ў фонд сацыяльнай абароны для мяне не ўплывае”.
У паліклініцы № 19 не пракамэнтавалі сытуацыю. Каб даведацца, ці практыкуецца падобнае ў іншых паліклініках, патэлефанавалі ў дзіцячую паліклініку № 1.
Загадчыца аддзяленьня Жана Карпіцкая патлумачыла:
“Існуе інструкцыя каму даецца ліст непрацаздольнасьці, а каму даецца даведка пра часовую непрацаздольнасьць. У тым выпадку, калі індывідуальны прадпрымальнік адлічае ўнёскі ў фонд сацыяльнай абароны, яму выдаюць ліст непрацаздольнасьці, калі – не, то толькі даведка”.
Прадпрымальніца Зінаіда з абурэньнем апавяла пра Галіну, якая працуе ў суседнім шапіку. Яна мае маленькае дзіця, якому толькі споўнілася два з паловай гады. Галіне зрабілі апэрацыю, выдалілі апэндыкс.
“Яна пайшла ў падатковую, а зь яе запатрабавалі бальнічны. А бальнічны ёй не даюць. Сказалі, што толькі могуць даць на 14 дзён, ня болей. Яна прыйшла ўся скручаная на рынак і скардзілася. Ёй трэба ехаць ажно ў Бабруйск. Яна там стаіць на ўліку. Яна кажа: “Мне на дарогу толькі на адну трэба 130 тысяч. А мне іх хто-небудзь аддасьць?”.
Старшыня прадпрымальніцкай арганізацыі “Пэрспэктыва” Анатоль Шумчанка выказаў сваё меркаваньне:
“Я лічу, што гэта з’ява дыскрымінацыі. Нельга дзяліць на прадпрымальнікаў і непрадпрымальнікаў. Мы ўсе грамадзяне
Прадпрымальнікі мусяць карыстацца такімі ж правамі, як і іншыя грамадзяне
Прадпрымальнікі абураюцца і спасылаюцца на тое, што іх мэдычныя карткі, а таксама іх дзяцей знаходзяцца ў рэгістратуры дзяржаўных раённых паліклінік і, паколькі ім не адмаўляюць у прыёме, то яны мусяць мець аднолькавыя правы зь іншымі пацыентамі.
