Лінкі ўнівэрсальнага доступу

Штодня ў сьвеце памірае 26 тыс. дзяцей да 5 гадоў


ЮНІСЭФ – Дзіцячы фонд Арганізацыі Аб’яднаных Нацыяў – выпусьціў новую справаздачу пра стан дзяцей ў сьвеце. У ёй падаюцца стратэгіі дзеля зьмяншэньня колькасьці дзяцей, якія паміраюць, не дажыўшы да пяці гадоў.


Нягледзячы на тое, што цягам апошніх гадоў зьменшылася сьмяротнасьць сярод дзяцей да пяці гадоў, ЮНІСЭФ лічыць праблему дзіцячага выжываньня вострай і прапануе свае ініцыятывы. Кіраўнік ЮНІСЭФ Эн Вэнэман падкрэсьлівае, што паляпшэньне мэдычных паслугаў для маці, немаўлят і маленькіх дзяцей, удасканаленьне нацыянальных сыстэмаў аховы здароўя могуць уратаваць жыцьці многіх з болей як 26 тысяч дзяцей, якія паміраюць ў сьвеце кожны дзень.

У справаздачы паказаны ўплыў простых, шырокадаступных захадаў на выжываньне дзяцей. Прыкладам – выключнае кармленьне грудзямі, імунізацыя, вірусная прафіляктыка, дадаваньне ў ежу вітаміну А, Гэта тыя захады, якія выкарыстоўваліся супраць дзіцячай сьмяротнасьці апошнімі гадамі і мелі плён.

ЮНІСЭФ рэкамэндуе павялічыць намаганьні ў прафіляктыцы пнэўманіі, дыярэі, малярыі, вострага недаяданьня і СНІДу. Нацыянальныя сыстэмы аховы здароўя павінны забясьпечыць шырокі доступ дзяцей да магчымасьцяў мэдыцыны. І вырашальнымі тут могуць стаць новыя інвэстыцыі ў ахову здароўя. Але нават і ў слабых сыстэмах аховы здароўя могуць быць дасягнутыя посьпехі, – заяўляе генэральны дырэктар Усясьветнай арганізацыі аховы здароўя Маргарэт Чан. Яна падкрэсьлівае, што інавацыйныя праграмы ў многіх краінах сьведчаць, што нават калі адзін раз дзіця атрымае поўны пакет абслугоўваньня, гэта можа прынесьці карысьць.

У справаздачы падаюцца прыклады пасьпяховых ініцыятываў, такіх, як дапамога зьбяднелым сем’ям у Чорнай Афрыцы ці Ініцыятыва ў змаганьні з адром. Глябальная кампанія тады дапамагла зьменшыць сьмяротныя выпадкі гэтай хваробы прыблізна на 68 працэнтаў ва ўсім сьвеце, і больш як на 90 працэнтаў у Афрыцы, пачынаючы з 2000 году.

Справаздача рэкамэндуе неабходнасьць спалучэньня інвэстыцыяў як у сыстэмы аховы здароўя, гэтак і мэтанакіравана ў мясцовыя амбуляторыі і шпіталі. Важна, каб трапляла дапамога нават у самыя аддаленыя рэгіёны. Найбольш выразна праблема бачыцца на прыкладзе Чорнай Афрыкі, дзе ў 2006 годзе адбылася амаль палова ўсіх сьмерцяў дзяцей да пяці гадоў, пры тым, што там жывуць меней за чвэрць усіх дзяцей сьвету.

“Дзіцячае выжываньне – ня толькі праблема правоў чалавека, гэта таксама і праблема разьвіцьця”, – кажа віцэ-прэзыдэнт Усясьветнага банку ў пытаньнях разьвіцьця людзкіх рэсурсаў Джой Фумафі. Яна падкрэсьлівае, што інвэстыцыі ў здароўе дзяцей і іхных мацярок ёсьць важным эканамічным укладаньнем і адным з безумоўных шляхоў тых краінаў, якія выбіраюць курс на лепшую будучыню”.


ЮНІСЭФ – Дзіцячы Фонд Арганізацыі Аб’яднаных Нацыяў – працуе болей як у 150 краінах, у тым ліку і ў Беларусі, дзеля дапамогі дзецям выжываць і пасьпяхова разьвівацца ад раньняга дзяцінства да юнацтва. ЮНІСЭФ зьяўляецца найбольшым пастаўшчыком вакцынаў у разьвіваныя краіны. Ён падтрымлівае захады на паляпшэньне здароўя дзяцей, якасную адукацыю, абарону дзяцей ад гвалту, эксплюатацыі. ЮНІСЭФ фінансуецца даабраахвотнымі складкамі людзей, фірмаў, фондаў і ўрадаў.


  • 16x9 Image

    Вячаслаў Ракіцкі

    Вячаслаў Ракіцкі – беларускі журналіст, тэатральны і кінакрытык, рэжысэр і сцэнарыст дакумэнтальнага кіно, перакладчык. Кандыдат мастацтвазнаўства. Сябра Саюзу беларускіх пісьменьнікаў і Беларускай асацыяцыі журналістаў. Аўтар Радыё Свабода з 1997 году.

XS
SM
MD
LG