Лінкі ўнівэрсальнага доступу

"Канец цытаты": 12.01.2008 – 18.01.2008


Самыя яскравыя выказваньні герояў перадачаў “Свабоды” за мінулы тыдзень.


“Калі дзяржаве не патрэбныя прадпрымальнікі, то тады навошта ім арганізацыя, якая абараняе іх правы?”

Вольга Круміна, намесьніца старшыні арганізацыі прадпрымальнікаў “Пэрспэктыва” – пра намер уладаў ліквідаваць гэтую арганізацыю.


“Усе гэтыя арышты — нішто іншае, як спроба запалохаць перад 21-м. Гэта адзін з рэпрэсіўных мэтадаў спыненьня нейкіх актыўных дзеяньняў. Але гэта ўжо не спрацуе. Колькі б ні арыштоўвалі, на месца аднаго прыйдуць двое. Людзі ўжо настолькі самаарганізаваліся. Чым болей яны чуюць і бачаць гэтыя арышты, несправядлівасьць, тым болей яны абураюцца і гатовыя выходзіць на абарону сябе і сваіх таварышаў”.

Вітар Гарбачоў, лідэр кампаніі “За свабоднае разьвіцьцё прадпрымальніцтва” – пра перасьлед палітычных актывістаў і актывістаў прадпрымальніцкага руху.


“А наконт таго, што не вылучаюцца палітычныя лёзунгі, то ў душы кожны разумее, ад каго гэта ідзе і ад каго гэта залежыць”.

Аляксандар Цацура, лідэр прадпрымальнікаў Салігорску – у перадачы “Праскі акцэнт” пра акцыі пратэсту прадпрымальнікаў супраць 760-га ўказу.


“Я сказала, што цяпер хлопцы сядзяць, а мы перамаўляемся. Але нам далі зразумець яшчэ ў фае, што гэта не перамовы, а тлумачэньне нейкіх момантаў, якія ім не зразумелыя. Чаму прадпрымальнікі не пераходзяць у “ПУПы”? Мы патлумачылі, што ня можам, таму й не ідзём. Сядзець у партызанах і не падтрымліваць сувязь, я таксама лічу, няправільна”.

Ірына Яськевіч, старшыня прадпрымальніцкага прафсаюзу “Разам” – пра перамовы ў адміністрацыі прэзыдэнта.


“Некаторыя гарачыя галовы зь ліку апанэнтаў улады настойліва спрабуюць арганізаваць нейкую так званую антыядзерную кампанію сярод насельніцтва. Ствараецца ўражаньне, што некаторыя нашы апазыцыянэры і вучоныя жывуць у вакуўме, у нас, як заўсёды, беларускасьць бяжыць наперадзе розуму…Я думаю, будучыя пакаленьні ацэняць наша рашэньне".

Аляксандар Лукашэнка, кіраўнік Беларусі – выступаючы на пасяджэньні Рады бясьпекі, на якім было прынятае палітычнае рашэньне аб будаўніцтве ў краіне АЭС.


“Можна і трэба весьці дыпляматычны дыялёг на вострыя тэмы, але робячы гэта ўзважана і не выкарыстоўваючы “гукаўзмацняльнікаў”.

Гебхард Вайс, пасол Нямеччыны – з нагоды згоды беларускіх уладаў на працяг працы офісу АБСЭ.


“Майго сына, аднаго з найлепшых ліцэістаў свайго часу, будуць разам зь ягонымі сябрамі судзіць у былым будынку ліцэю, які сёньня стаў часткай рэпрэсіўнай машыны”.

Вінцук Вячорка, намесьнік старшыні Партыі БНФ – пра суд над яго сынам Франакам, які адбываўся ў будынку, дзе калісьці месьціўся Коласаўскі ліцэй.


“Я хачу зьвярнуцца да прадпрымальнікаў: будзьце салідарныя з намі, так, як мы былі з вамі”.

Антон Каліноўскі, сябра арганізацыі “Моладзь БНФ” – напярэдадні суду над ім па абвінавачваньні ў “бруднай лаянцы”.


"З намі Бог і Хрыстовая сіла".

Аляксандар Зьдзьвіжкоў, былы намесьнік рэдактара газэты “Згода” – пасьля абвяшчэньня прысуду ў 3 гады калёніі ўзмоцненага рэжыму па абвінавачваньні у “распальваньні рэлігійнай варожасьці”( у лютым 2006 году ён апублікаваў у “Згодзе” карыкатуры на Прарока Мухамэда).


“Мы не заклікаем да таго, каб было “зуб – за зуб, вока – за вока, кроў – за кроў”. Наша рэлігія – самая мірная. І мы не патрабавалі, каб яго пасадзілі. Мне здаецца, можа б і штрафу хапіла. Ды і газэту закрылі. Гэта таксама страты. Але ж я не магу дыктаваць нашаму заканадаўству. Яно абараняе правы грамадзянаў. Мая думка такая – мы ўсе адкажам перад Усявышнім. І ён, і я, і ўсе. У судны дзень адкажам за ўсё, зробленае намі”.

Абу-Бэкір Шабановіч, муфтый мусульманскага рэлігійнага аб’яднаньня ў Беларусі – пра прысуд Аляксандру Зьдзьвіжкову.
  • 16x9 Image

    Юры Дракахруст

    Журналіст. Нарадзіўся ў 1960 г. Зь 2000 г. — супрацоўнік Беларускай рэдакцыі Радыё Свабода ў Празе. Ляўрэат прэміі Беларускай асацыяцыі журналістаў (1996).
     

XS
SM
MD
LG