Лінкі ўнівэрсальнага доступу

Магчымага прэзыдэнта ЗША ўжо не пускалі ў Беларусь


Ці можна ўжо цяпер прагназаваць, хто стане кандыдатам у прэзыдэнты ЗША ад дзьвюх асноўных партыяў? Які кандыдат больш падыходзіць Беларусі?


Віталь Цыганкоў гутарыць з палітолягам Віталем Сіліцкім.

Цыганкоў: “Пераможцамі “праймэрыз” у амэрыканскім штаце Нью-Гэмпшыр сталі Гілары Клінтан – у дэмакратаў і Джон Маккэйн – у рэспубліканцаў. Пераможца папярэдніх выбараў у Нью-Гемпшыры часта ў амэрыканскай гісторыі станавіўся кандыдатам ад сваёй партыі і адпаведна, пераможцам выбараў. На вашую думку, ці могуць Гілары Клінтан і Джон Маккэйн ужо лічыцца фаварытамі ў прэзыдэнцкай гонцы?”

Сіліцкі: “Дарэчы, апошнія два разы гэтае “правіла” было парушанае. Біл Клінтан і Джордж Буш не перамагалі ў Нью-Гемпшыры, так што можа казаць пра новую тэндэнцыю.

Перад Нью-Гемпшырам у дэмакратаў выглядала, што кандыдатура Гілары Клінтан можа проста рассыпацца. Але гэтага не адбылося, і ўжо цяпер з вялікай доляй верагоднасьці можна казаць, што ад дэмакратаў будзе Гілары Клінтан. А ў рэспубліканцаў нічога няясна, і ўсе будзе рашацца толькі ў “супераўторак” 5 лютага”.

Цыганкоў: “Мяне ўразіла, як многія кандыдаты (ня толькі сярод дэмакратаў, але і рэспубліканцаў) выкарыстоўваюць лёзунг: “За перамены” ў той ці іншай інтэрпрэтацыі. Няўжо прага пераменаў настолькі запатрабавана амэрыканскім грамадзтвам?”

Сіліцкі: “Безумоўна, лёзунг: “За перамены” вельмі папулярны пры непапулярным прэзыдэнце. Майце на ўвазе, што гэта першыя выбары за столькі гадоў, у якіх ня ўдзельнічае Белы дом. Гэта дадае абсалютнай інтрыгі, бо няма відавочнага кандыдата.

Што да сапраўднасьці гэтага лёзунгу, то калі я гляджу на Гілары Клінтан, то мне хочацца наляпіць лёзунг: “За стабільнасьць”. Бо яе лёзунг – гэта: “Былі добрыя часы, калі мы з Білам кіравалі, і эканоміка расла, бясьпека была, ваяваць не ваявалі”. Фактычна Гілары ідзе як даволі кансэрватыўны кандыдат пад дэвізам: “Уперад, у мінулае”.

Цыганкоў: “Які кандыдат больш падыходзіць Беларусі? Хто лепш для афіцыйнай Беларусі, хто лепш для апазыцыйнай?”

Сіліцкі: “Акрамя Джона Маккэйна, які быў спонсарам шэрагу законапраектаў, што тычацца Беларусі, астатнія – на адным узроўні. Майце на ўвазе, што сэнатару Маккэйну калісьці адмовілі ў беларускай візе, што стварае даволі далікатную сытуацыю, калі ён раптам стане Прэзыдэнтам ЗША”.
  • 16x9 Image

    Віталь Цыганкоў

    Віталь Цыганкоў скончыў факультэт журналістыкі БДУ. Адзін з двух заснавальнікаў першага недзяржаўнага агенцтва навінаў БелаПАН. Працаваў ў газэтах «Звязда», быў карэспандэнтам у Беларусі расейскай «Независимой газеты», Associated Рress, аглядальнікам у газэце «Свабода». На беларускай Свабодзе ад 1994 году. Карэспандэнт расейскай Свабоды ў Беларусі.
     

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG