Лінкі ўнівэрсальнага доступу

Партыі камуністаў Беларускай пагражае ліквідацыя?


Інфармацыйнае агенцтва БелТА паведаміла, што Міністэрства юстыцыі Беларусі мае намер ініцыяваць ліквідацыю Партыі камуністаў Беларускай.


Намесьніца старшыні партыі Алена Скрыган лічыць, што Мін’юст ня зможа пачаць працэс ліквідацыі партыі да 2 лютага.

“Жаданьне ў міністэрства юстыцыі даўно такое ёсьць, але да 2 лютага дзейнасьць партыі прыпыненая рашэньнем Вярхоўнага Суду. І я думаю, што да 2 лютага нічога адбыцца ня можа, якія б жаданьні ні былі. За 10 дзён да гэтага тэрміну мы павінны зрабіць для міністэрства юстыцыі справаздачу пра тое, як мы выканалі рашэньне суду, прыкласьці дакумэнты да гэтага рашэньня. І толькі пасьля 2 лютага могуць рабіцца пэўныя захады Мін’юсту.

Гэта рэальныя пагрозы, і яны могуць тычыцца любой палітычнай партыі, калі на гэта будзе палітычная воля нашага кіраўніцтва. Лічу, што наконт нашай партыі такая воля даўно ёсьць. А як яна будзе выконвацца? Пабачым...”, —кажа Алена Скрыган.

Тым часам першы сакратар ЦК ПКБ Сяргей Калякін накіраваў ліст у Міністэрства юстыцыі, Вярхоўны Суд і БелТА ў сувязі з вышэйзгаданым паведамленьнем гэтага інфармацыйнага агенцтва.

Як піша Калякін, “усе факты гэтага паведамленьня не адпавядаюць рэальнасьці, паколькі шасьцімесячны тэрмін прыпыненьня дзейнасьці партыі заканчваецца 2 лютага 2008 году”. І кіраўніцтва ПКБ расцэньвае “гэтае паведамленьне як палітычна матываваную акцыю, мэтаю якой зьяўляецца чарговая кампрамэтацыя ПКБ”, гаворыцца ў лісьце.

Летась 2 жніўня Вярхоўны Суд Беларусі прыпыніў на шэсьць месяцаў дзейнасьць Партыі камуністаў Беларускай. Менавіта на такім пакараньні настойвала Міністэрства юстыцыі. ПКБ цягам году атрымала тры папярэджаньні. Мінюст ставіць у віну партыі сыстэматычнае парушэньне патрабаваньняў заканадаўства — удзел партыі ў стварэньні Саюзу левых партыяў, а таксама падачу ў міністэрства “непраўдзівай інфармацыі пра асабовы колькасны склад партыі”.
  • 16x9 Image

    Ганна Соўсь

    Ганна Соўсь нарадзілася ў Менску. Скончыла факультэт журналістыкі БДУ. Працавала ў незалежнай газэце «Народная воля»(1997-2000). Ад 2000 году працуе на «Свабодзе». Кнігі на «Свабодзе» — «Дарога праз Курапаты» (аўтарка рэпартажаў), «Адзін дзень палітвязьня» (ідэя і ўкладальніца), «Адзін дзень палітвязьня. 2009-2011»(ідэя і ўкладальніца), «Жыцьцё пасьля раку» (аўтарка ідэі і каардынатарка праекту, рэдактарка). Аўтарка праекту «Расея і я», сэрыі інтэрвію з 12 экс-прэзыдэнтамі постсавецкіх кранаў. Сябра БАЖ.

XS
SM
MD
LG