Лінкі ўнівэрсальнага доступу

“Малады фронт” правёў калядны фэст


Сябры незарэгістраванай арганізацыі “Малады фронт” правялі калядны кірмаш. На выставу-кірмаш прыйшлі людзі рознага ўзросту. Маладафронтаўцы сваімі рукамі зрабілі экспазыцыю. Грашовыя сродкі ад кірмашу паступяць у дзіцячы дом.



Выстава-кірмаш адбылася ў вялікай залі сядзібы Партыі БНФ. Маладафронтаўцы ўпрыгожылі залю папяровымі анёламі і зоркамі. А 6-й вечара ў сядзібе было шмат людзей, але большасьць зь іх – сябры “Маладога фронту”. Нягледзячы на сьвяточнае ўбранства, настрой маладафронтаўцаў быў невясёлы. Яны абмяркоўвалі ўчорашні прысуд Артуру Фінькевічу. Усе чакалі, што Артура вызваляць у судовай залі, таму прысуд – паўтара году турмы – успрынялі балюча.

Па руках хадзілі вялікія паштоўкі Зьмітру Дашкевічу і Артуру Фінькевічу.

Людміла Атакулава апавяла:

“Тут мы на паштоўках зьбіраем пажаданьні маладафронтаўцам, якія знаходзяцца цяпер за кратамі, Артуру Фінькевічу і Зьмітру Дашкевічу. Вельмі шмат добрых словаў напісалі людзі”.

Адна з арганізатараў кірмашу Кася Краснова прадэманстравала экспазыцыю:

“Маладафронтаўскія дзяўчаты рабілі сваімі рукамі лялькі, розныя цацкі, калядныя ўпрыгожваньні... Наколькі цяжка было рыхтаваць? Напэўна, ня вельмі цяжка фізычна, бо мы думалі, як стварыць сьвята, як нам дапамагчы дзеткам. Ім патрэбная наша дапамога і ўвага”.

Кася Галіцкая дадала:

“Сёньня “Малады фронт” праводзіць калядны фэст. Усе сабраныя сродкі пойдуць на падарункі дзецям з дзіцячых дамоў. На сьвяточны канцэрт мы запрасілі Андрэя Мельнікава і Зьмітра Казлоўскага. Адбыўся калядны кірмаш, дзе ўсе маглі набыць сабе рэчы, зробленыя маладафронтаўцамі”.

Маладафронтаўцы летась правялі каляднае шэсьце па менскіх вуліцах. Тады яны зьбіралі грошы на лячэньне хворага хлопчыка. Сёлета сродкі пойдуць у дзіцячы дом. Маладафронтаўцы заплянавалі правесьці выставу-кірмаш і шэсьце ў дзень нараджэньня Кастуся Каліноўскага.

Паказаць камэнтары

XS
SM
MD
LG