Наступны раз дэпутаты, згодна зь дзейным заканадаўствам, зьбяруцца толькі 2 красавіка 2008 году.
Старшыня Палаты прадстаўнікоў Вадзім Папоў на выніковай прэсавай канфэрэнцыі гаварыў пра надзвычай добрае ўзаемадзеяньне ўсіх галінаў улады ў Беларусі.
“Асабліва адзначу канструктывізм, які ўзмацніўся ў законатворчым працэсе, і ўзгодненасьць пры галасаваньні па самых рэзанансных законапраектах, што сьведчыць пра іх добрую прапрацоўку. Накладкі, якія ўзьнікалі, мы зьнялі праз працэдуру ўзгадненьня, безь непатрэбнага нагнятаньня.
Лічу такі падыход вельмі важным. Бо з нашых паводзінаў людзі робяць высновы ня толькі пра дзейнасьць парлямэнту, але і пра ўзровень адзінства галінаў улады. А значыць, і пра стабільнасьць у дзяржаве, грамадзтве”.
Інакш глядзіць на сытуацыю дэпутат Віктар Кучынскі, які, дарэчы, нязьменна працуе ў парлямэнце з часоў Вярхоўнага Савету 12-га скліканьня. Нагодай для публічнага выступу стала рашэньне ягоных калегаў, якія сёньня зьмянілі закон аб Савеце Міністраў, увёўшы ў склад ураду кіраўніка прэзыдэнцкай Адміністрацыі і старшыню Камітэту дзяржкантролю. Кучынскі лічыць, што з гэтага атрымаўся “прававы вінэгрэт”:
“Нельга рабіць такія рэчы з адной простай прычыны — трэба ж паважаць саміх сябе, Канстытуцыю і тыя рашэньні, якія прымаюцца. Канстытуцыя вызначае, што Камітэт дзяржкантролю кантралюе выкананьне бюджэту, актаў ураду, прэзыдэнта і г.д. Як можна кіраўніка структуры, якая павінна кантраляваць урад, уводзіць у склад ураду?!
Такі хаос у норматворчасьці прысутнічае ў шмат якіх законапраектах, то бок тых праектах законаў, якія да нас сюды паступаюць”.
Дэпутат Вярхоўнага Савету 13 скліканьня Аляксандар Дабравольскі гэтак ацэньвае дзейнасьць цяперашняй Палаты прадстаўнікоў:
“Гэтыя людзі, у сваёй бальшыні нікому не вядомыя, ніколі не выступяць насуперак таго, што прапануюць з прэзыдэнцкай Адміністрацыі. Яны, быццам бы абраныя (хоць тут ёсьць вялікі сумнеў), адмянілі ўсе сацыяльныя гарантыі для сваіх выбаршчыкаў. І калі бязьдзейнасьць і адсутнасьць ініцыятывы лічыць прыкладам працы, дык тады яны гэтаму і адпавядаюць”.
