Лінкі ўнівэрсальнага доступу

Бабруйскіх моладзевых актывістаў судзяць за бел-чырвона-белы сьцяг


Радыё Свабода У Бабруйску працягваецца суд па справе актывіста “Маладога фронту” Дзяніса Буйніцкага і прадстаўніка аб’яднаньня “Моладзь БНФ” Сержука Лацінскага. Іх абвінавачваюць у выкарыстаньні незарэгістраванай сымболікі. 24 кастрычніка падчас кацэрту “Рок за “Баброў” яны паднялі бел-чырвона- белыя сьцягі, пасьля чаго іх затрымалі міліцыянты.

Бабруйскі праваабаронца Ігар Ходзька заявіў, што юнакоў ужо судзілі па гэтым факце, таму іх мусяць апраўдаць. Пасьля канцэрту іх абвінавацілі ў дробным хуліганстве і, паводле рашэньня суду, пакаралі пазбаўленьнем волі на двое сутак. Амонаўцы сьцьвярджалі, што маладзёны нібыта на іх кідаліся і брудна лаяліся.

Актывісты дэмакратычных моладзевых аб’яднаньняў на судзе заявілі, што такое абвінавачаньне ня можа быць праўдай, а іх затрымалі за выкарыстаньне нацыянальнай сымболікі. Амонаўцы ў суд не зьявіліся, што і стала падставай для пераносу судовага пасяджэньня. Адказьнікі лічаць, што суд скончыцца на іх карысьць. Прайшло амаль два месяцы з часу правядзеньня рок-канцэрту, адпаведна заканчваюцца тэрміны разгляду суду.
XS
SM
MD
LG