Лінкі ўнівэрсальнага доступу

У Кіеве правялі акцыю салідарнасьці зь Беларусьсю


Паўло Зуб’юк, Кіеў Сёньня ў Кіеве адбылася акцыя салідарнасьці зь Беларусьсю, арганізаваная незалежнымі грамадзкімі актывістамі.

У сёньняшняй акцыі, ў адрозьненьні ад той, якая адбылася месяц назад, удзельнічалі некалькі грамадзкіх арганізацыяў, такіх як “Міжнародная Амністыя”, Украінскі хэльсынскі саюз па правох чалавека, Альянс “Майдан”.

Вось як пракамэнтавала свой удзел у акцыі Галіна, сябра “Міжнароднае Амністыі”:

(Галіна: ) “Я зьяўляюся прадстаўніком “Міжнароднае Амністыі”. Мы прыйшлі сюды, каб паставіць сьвечку пашаны ахвяраў парушэньня правоў чалавека. Таксама гэта сымбаль надзеі на тое, што хутка свабода слова і свабода думкі ў Беларусі ня будзе злачынствам”.

Удзельнікі акцыі паставілі сьвечкі на тратуары насупраць манумэнта Незалежнасьці. У гэты час тут жа праводзілі пікет прадстаўнікі радыкальнае антыюшчанкаўскае партыі “Братство”. Яны трымалі партрэты Лукашэнкі і скандавалі “Лукашэнка – forever!”

Цікава тое, што ў 1996 годзе сёньняшні кіраўнік “Братства” Зьмітро Карчынскі, які тады ўзначальваў арганізацыю УНА-УНСО выступаў катэгарычна супраць рэжыму Аляксандра Лукашэнкі ў Беларусі і арганізоўваў паездкі сяброў гэтае арганізацыі на апазыцыйныя акцыі ў Менск.

Вось як адказаў на пытаньні адзін з удзельнікаў гэтага пікету, які не пажадаў называць сваё імя:

(Карэспандэнт: ) “А чаму вы ўжываеце ангельскае слова “Forever”, а не расейскае “навсегда””?

(Удзельнік: ) “Не гучыць... Мы тут сабралісь... Мы сабралісь тут... У першую чаргу каб... Як гэта Вам патлумачыць... Сабралісь тут, каб паказаць волю ўкраінскага народу, што мы хочам адзіных стандартаў, стандартных законаў зь Беларусьсю. Каб у нас быў адзін легітымны прэзыдэнт, значыць, каб былі правільныя законы, каб мы ўпатраблялі нашыя родныя прадукты, якія растуць на нашых палетках, а не кармілі НАТО і ЭЗ”.

Каб пазьбегнуць канфлікту з пралукашэнкаўскімі сіламі, удзельнікі акцыі салідарнасьці перайшлі на другі бок вуліцы, дзе працягнулі акцыю. Скончылася яна тым, што са сьвечак на тратуары ўдзельнікі акцыі выклалі вялікае чысло 16.
XS
SM
MD
LG