Лінкі ўнівэрсальнага доступу

Польскі кіраўнік МЗС вызначыць стаўленьне Эўропы да афіцыйнага Менску?


Аляксей Дзікавіцкі, Варшава Польскі штодзёньнік “Gazeta Wyborcza” піша сёньня пра тое, што ад таго, які зь міністраў замежных справаў Польшчы – стары ці новы – будзе прадстаўляць Варшаву ў часе штомесячнага спатканьня кіраўнікоў МЗС 25 краінаў Эўразьвязу ў Брусэлі, залежыць будучае стаўленьне аб’яднанай Эўропы да афіцыйнага Менску.

Польшча ўжо працягы час дамагаецца, каб пытаньне аб сытуацыі ў Беларусі было абмеркаванае на як мага больш высокім узроўні ў Эўразьвязе і гэта, урэшце, атрымалася: 7 лістапада адбудзецца сустрэча 25 міністраў замежных справаў краінаў Эўразьвязу – гэтак званай Рады ў агульных справах, дзе як раз і заплянваная дыскусія аб перасьледзе апазыцыі і нацыянальных меншасьцяў у Беларусі. Дагэтуль адзіным органам Эўразьвязу, які дэбатаваў у справе Беларусі, быў Эўрапарлямэнт.

“Аднак цяпер з прычыны затрымак з стварэньнем новага ўраду ў Брусэль можа паехаць стары міністар замежных справаў Адам Ротфэльд. Нашыя крыніцы ў Брусэлі не хаваюць, што размова пра Беларусь была б добрай нагодай для дэбюту менавіта новага кіраўніка МЗС Польшчы, які ме ў бы большае поле манэўру, чым Ротфэльд”, -піша “Gazeta Wyborcza”.

Штодзёньнік адзначае, што адыходзячы ўрад зрабіў шмат, каб Эўразьвяз даў цьвёрды, адназначны сыгнал Менску, што ня будзе пагаджацца з палітыкай Лукашэнкі што да апазыцыі і меншасьцяў. Сярод іншага гаворка ішла пра пашырэньне сьпісу беларускіх чыноўнікаў, якім забаронены ўезд на тэрыторыю краінаў Эўразьвязу на некалькі асобаў, якія адказваюць за перасьлед СПБ, у тым ліку і былога кіраўніка раганізацыі спадара Кручкоўскага, што ўжо зрабіла Польшча.

“Большасьць краінаў Эўразьвязу, аднак, ня хочуць пагадзіцца з гэтым. Частка лічыць, што Брусэль не павінен умешвацца ў спрэчку паміж Варшавай і Менскам, для іншых гэтая справа занадта далёкая ў сэнсе геаграфічным. Польшчу падтрымліваюць літоўцы і швэды, крыху разуменьня выказваюць немцы, французы і фіны, аднак гэтага недастаткова” – піша “Wyborcza”.

Менавіта таму, паводле штодзёньніка, прысутнасьць новага кіраўніка МЗС Польшчы на сустрэчы ў Брусэлі магла б дапамагчы пераканць іншыя краіны ў слушнасьці пазыцыі Варшавы.

Гэтак, хутчэй за ўсё, аднак ня здарыцца, бо новы польскі прэм’ер Казімеж Марцінкевіч заплянаваў на 10 лістапада першую прамову ў гэтай якасьці ў парлямэнце, тады ж будзе зацьверджаны і склад новага ўраду. Праз тры дні пасьля сустрэчы ў Брусэлі.
XS
SM
MD
LG