Лінкі ўнівэрсальнага доступу

Беларусь зьвярнула ўвагу МАГАТЭ на канфлікт зь Літвой


Міхал Стэльмак, Менск Беларусь спадзяецца на дапамогу Міжнароднага агенцтва па атамнай энэргіі (МАГАТЭ) ва ўрэгуляваньні экалягічнага канфлікту зь Літвой, зьвязанага з плянуемым будаўніцтвам паблізу літоўска-беларускай мяжы сховішча радыяактыўных адкідаў.

Пра гэта заявіў намесьнік міністра замежных справаў Віктар Гайсёнак на 49-й сэсіі Генэральнай канфэрэнцыі МАГАТЭ, якая праходзіць у Вене.

У сваім выступе спадар Гайсёнак нагадаў, што гэтае сховішча прызначана для адпрацаванага ядзернага паліва Ігналінскай АЭС і радыяактыўных адкідаў. Беларусь, паводле ягоных словаў, разьлічвае на канструктыўны падыход Літвы і дапамогу МАГАТЭ ў вырашэньні гэтай адчувальнай для беларусаў праблемы.

Нагадаем таксама, што беларускія чыноўнікі прыгразілі Літве, што калі тая ня зьменіць сваіх плянаў, то Беларусь у адказ таксама паблізу беларуска-літоўскай мяжы пабудуе магутныя сьвінагадоўчыя комплексы. Літоўскі прэм’ер Альгірдас Бразаўскас назваў гэтыя пляны Беларусі “барбарствам”.
XS
SM
MD
LG