Лінкі ўнівэрсальнага доступу

Ці праўда, што адна дзяўчына ў Барысаве заразіла 30 чалавек віч-інфэкцыяй?


Іна Студзінская, Менск Часам у грамадзтве ўзьнікаюць чуткі, якія потым знаходзяць сваё адлюстраваньне ў сродках масавай інфармацыі наконт так званага ВІЧ-тэрарызму. То хадзілі жахлівыя гісторыі, што нібыта на сталічных дыскатэках наведвальнікам у натоўпе робяць уколы і заражаюць ВІЧ-інфэкцыяй. Не пацьвердзіліся. Нядаўна ў "БДГ" зьявіўся артыкул “Схаваная пагроза” з падзагалоўкам “Прывід ходзіць па Барысаву” пра сэксуальную тэрарыстку, на рахунку якой ня менш 30-ці ахвяраў, якіх яна быццам бы заразіла небясьпечнай інфэкцыяй. Ці ёсьць ў Беларусі ВІЧ-тэрарызм? Якая наагул сытуацыя па ВІЧ-інфэкцыі?

На верасень кумулятыўнае чысло ВІЧ-інфікаваных – 6749 чалавек. Больш за дзьве траціны гэта мужчыны, траціна – жанчыны. З пачатку году зарэгістравана 486 новых выпадкаў. Лідуе па-ранейшаму Гомельская вобласьць – 3754 выпадкі, на другім месцы – Менск, 972 ВІЧ-інфікаваных. Асноўны шлях перадачы інфэкцыі – праз ін’екцыі наркатычных рэчываў (больш за 68 адсоткаў). Але павялічваецца і колькасьць інфікаваных палавым шляхам – за 8 месяцаў амаль 54%.

Беларусь выглядае значна лепш за суседнія Украіну, дзе 151 ВІЧ-інфікаваны на 100 тысяч насельніцтва, і за Расею – 216 на 100 тысяч. У Беларусі 69 інфікаваных на 100 тысяч насельніцтва.

Што тычыцца выпадку ў Барысаве і сьцьвярджэньняў, што адна дзяўчына заразіла ВІЧ больш за 30 чалавек, гэта значна перабольшана. Сапраўды, год таму, летась у кастрычніку ў Барысаве было забойства маладой дзяўчыны, якую забіў былы партнэр быццам бы за тое, што яна ўзнагародзіла яго інфэкцыяй. Злачынства раскрылі, забойцу асудзілі на 8 гадоў пазбаўленьня волі. Калі б выявілі адразу 3 дзесяткі заражаных, як сьцьвярджае аўтар артыкулу, абавязкова б праводзілася эпідэміялягічнае расьсьледаваньне. Гаворыць загадчыца аддзелу Рэспубліканскага цэнтру прафіляктыкі СНІД Лілія Мялешка.

(Мялешка: ) “Да нас з Барысава інфармацыі пра тое, што было заражана шмат людзей, не паступала. У Барысаве ёсьць адмыслоўцы, якія гэтым займаюцца, яны б паведамілі ў абласны цэнтар гігіены і эпідэміялёгіі, той бы інфармаваў наш, рэспубліканскі цэнтар. І, натуральна, праводзілася б эпідэміялягічнае расьсьледаваньне. Ніякіх званкоў, ніякай інфармацыі, ніякіх дадзеных на гэты конт не паступала”.

Падчас расьсьледаваньня, сьцьвярджаецца ў артыкуле, удалося выявіць яшчэ 14 сэкс-партнэраў забітай жанчыны. Але іх было ня менш 30 – маўляў, тая помсьціла мужчынам. Адмыслоўцы сьцьвярджаюць, гэта зусім не азначае, што ўсе ейныя партнэры былі ВІЧ-інфікаванымі. Тлумачэньне загадчыцы аддзелу Рэспубліканскага цэнтру прафіляктыкі СНІД Ліліі Мялешкі.

(Мялешка: ) “Павінна быць і пэўная колькасьць вірусу, і пэўная колькасьць часу павінна прайсьці. Ня так проста заразіць. Ад уколаў наагул верагоднасьць заражэньня ад нуля да 90%. А ад аднаго ўколу ніколі ў жыцьці не заразісься. Павінна быць такая вялікая маса вірусу, каб заразіцца праз уколы! А полавым шляхам, будзем казаць шчыра, наагул невялікая верагоднасьць заразіцца. Невялікая. Але яна можа павялічвацца, калі ёсьць нейкія язвачкі, сьлізістая абалонка пашкоджаная, шмат полавых партнэраў было. А калі адзін раз – верагоднасьць практычна роўная нулю”.

Але гэта зусім не азначае, што пагрозы не існуе. Адмыслоўцы заўсёды папярэджваюць аб небясьпецы, групах рызыкі, адказных паводзінах. Чалавек сам павінен думаць пра сваё здароўе.
XS
SM
MD
LG