Лінкі ўнівэрсальнага доступу

Што беларусы думаюць пра ўрадавы крызіс ва Ўкраіне?


Браніслава Станкевіч, Віцебск У чацьвер прэзыдэнт Украіны Віктар Юшчанка адправіў у адстаўку ўрад на чале зь Юліяй Цімашэнкай. Што думаюць пра ўрадавы крызіс ва Ўкраіне беларусы? З гэтым пытаньнем наша карэспандэнтка зьвярнулася да людзей на вуліцах Віцебску.

(Карэспандэнтка:) “Як выставіцеся да апошніх падзеяў на Украіне: да ўрадавага крызысу, да зьменаў у кіраўніцтве краіны?”

(Спадарыня:) “Да тых падзеяў, што адбыліся, я стаўлюся добра, бо, я лічу, нельга было ставіць у кіраўніцтва дзяржавы жанчыну з крымінальным мінулым”.

(Карэспандэнтка:) “А ці паўплываюць, на Вашую думку, гэтыя падзеі на ўзаемадачыненьні паміж нашымі дзяржавамі?”

(Спадарыня:) “Я лічу, так. Бо мы – суседнія дзяржавы, а гэта адыгрывае пэўную ролю ва ўзаемадачыненьнях Расеі ды Беларусі.

(Хлопец:) “Украіна мяне ўвогуле ня вельмі цікавіць. Таму мне няма розьніцы.”

(Дзяўчына:) “Ой, я ня ведаю! Я жыву на Беларусі, і мне ўсё адно!”

(Спадар:) “Я лічу, што ў прынцыпе ў нас мусяць скласьціся добрыя стасункі з Украінай. Бо і прэзыдэнт Лукашэнка, і прэзыдэнт Пуцін так паставілі ўсе акцэнты, што ўсё будзе добра.”

(Хлопец:) “Адставілі Цімашэнку? А хто адставіў—Юшчанка? Значыць, прыбірае ўсіх, хто быў зь ім раней! На нас гэта ніяк не адаб’ецца, бо ў нас – уласная палітыка. І ніхто нам жыць не замінае !”

(Дзяўчына:) “Напэўна, гэта будзе дрэнна для дзяржавы – на Украіне гэта нядобра адаб’ецца”.

(Карэспандэнтка:) “А ці адаб’ецца гэта на ўзаемадачыненьнях паміж нашымі дзяржавамі?”

(Дзяўчына:) “Можа, і пацягне за сабою нейкі наступствы. І, я мяркую, ня самыя лепшыя”.

(Хлопец:) “Можа паўплываць, у прынцыпе. Я ж ня ведаю таго Юшчанкі!”

(Спадар:) “ А я лічу, што нічога надзвычайнага там ня здарылася – звычайная сварка паміж “гаспадарамі”, якія дзеляць уладу ды багацьце.”

(Карэспандэнтка:) “Ці паўплывае гэта на Беларусь? На нашыя ўзаемадачыненьні з Украінай?”

(Спадар:) “А тут вялікай розьніцы ня будзе. Галоўнае тое, што сам Юшчанка супраць Лукашэнкі – ён усё-ткі за дэмакратыю!”

(Хлопец:) “Я ўвогуле проста ня ведаю, як да гэтага ставіцца, трэба пра гэта даведацца больш інфармацыі.”

(Карэспандэнтка:) “ А ці паўплываюць, на Вашую думку, зьмены ва ўрадзе Украіны на ўзаемадачыненьні з Беларусьсю?”

(Хлопец:) “Я лічу, што любыя перамены ўплываюць на стасункі з іншымі дзяржавамі – гэта ж усё не дарма робіцца!”

(Карэспандэнтка:) “І ў які бок, на Вашую думку, зьменяцца гэтыя стасункі?”

(Хлопец:) “У любы бок. Гэта нікому не вядома. Могуць па-рознаму зьмяніцца: гэта рызыка, 50 на 50.”
XS
SM
MD
LG