Лінкі ўнівэрсальнага доступу

logo-print

Улады ліквідоўваюць трэцюю па ліку царкву цягам месяца (фота)


Любоў Лунёва, Менск Пратэстанцкай царкве "Новае жыцьцё” пагражае ліквідацыя. Менгарвыканкам патрабуе, каб вернікі аддалі свой будынак дзяржаве. Пастар Вячаслаў Ганчарэнка адной з прычынаў канфлікту называе ўзмацненьне рэлігійнай нецярпімасьці з боку ўладаў. Вернікі пачалі акцыю пратэсту. Яны будуць заставацца ў храме бесьперапынна, зьмяняючы адзін другога. Сьвятар заявіў, што будынку добраахвотна не аддадуць.

“Царква новага жыцьця” зарэгістравана ў Мінюсьце ў 1992 годзе. Яна налічвае больш за 1 000 вернікаў. Храм пратэстантаў (былы калгасны кароўнік) знаходзіцца на ўскрайку Менску. Вернікі набылі яго ў 2002 годзе. Там разьмясьцілася й нядзельная школа.

Праблемы пачаліся пасьля прыняцьця новага Закону аб рэлігіі. Чыноўнікі Менгарвыканкаму паведамілі вернікам, што тыя ня маюць права зьмяніць мэтавага прызначэньня кароўніка, аднак жа, пры гэтым, трымаць кароў у межах гораду таксама нельга. Пастара й адміністратара царквы аштрафавалі на вялікія сумы.

Насупраць спрэчнага будынку ў вагончыку месьціцца праваслаўны храм, але гэта не выклікае прэтэнзіяў з боку ўлады.

Менгарвыканкам два тыдні таму пазбавіў Царкву зямельнага надзелу. Ад сёньняшняга дня вернікам прапанавалі пакінуць памяшканьне. Прыватную ўласнасьць перавядуць у дзяржаўную, пералічыўшы грошы на рахунак царквы. Такім чынам, з прычыны таго, што ў пратэстантаў ня будзе юрыдычнага адрасу, іхную суполку зьліквідуюць.

Пастар Вячаслаў Ганчарэнка называе некалькі прычынаў гэткай сытуацыі.

(Ганчарэнка: ) “Я лічу, што наша сытуацыя абумоўлена некалькімі прычынамі. Першая — ідэалёгія дзяржавы, якая аддае перавагу праваслаўнай канфэсіі. Другая — ня выключана, што чыноўнікі зацікаўлены забраць зямлю й будынак, каб на гэтым месцы пачаць будаўніцтва прыватных катэджаў. Трэцяя — небясьпечнае ўзмацненьне рэлігійнай нецярпімасьці”.

Дыякан “Царквы Новага жыцьця” Васіль Юрэвіч паведаміў Радыё Свабода, што вернікі пачалі бестэрміновую акцыю пратэсту. Яны будуць кругласуткава заставацца ў храме, зьмяняючы адзін аднаго.

(Юрэвіч:) “Ад сёньняшняга дня мы пачынаем акцыю пратэсту супраць гэтага рашэньня. Адні людзі будуць зьмяняць другіх. У храме будуць знаходзіцца кожны дзень, кожную гадзіну нашы людзі. Калі раптам нашы ўлады прыйдуць выганяць нас з нашага будынку з АМОНам і зь міліцыяй, — мы гатовы стаяць да апошняга. Мы гатовы зрабіць гэты крок, мы прынялі рашэньне. Мы ведаем, што з намі Бог, які нас падтрымлівае кожную хвіліну. Галоўны суд для нас — божы, галоўныя прынцыпы — біблейскія прынцыпы”.

Васіль Юрэвіч не выключае, што некаторыя вернікі могуць распачаць галадаваньне.

Міліцэйскае кіраўніцтва Маскоўскага раёну пагражае вернікам сілавымі мэтадамі, калі яны добраахвотна не пакінуць будынку.

Пратэстанты іншых суполак, а таксама габрэйскія арганізацыі выказалі падтрымку вернікам “Царквы Новага жыцьця”.



XS
SM
MD
LG